麥兜的祖先麥仲肥是個發明家，他有料但樣樣爭少少；關心妍是女版麥仲肥，她唱得但過去10年樣樣博到盡，結果都係唔上唔落爭少少。
今天，她計劃在峇里結婚，新郎哥是金融才俊楊長智。兩人拍拖3年，大筆一揮情定今生。楊長智為她遮風擋雨，事事周到，她怎能不感動？「佢對我嘅好，當我有80歲命，淨番嗰50年命我都未還到畀佢。」一世人樣樣爭少少應該很感慨，但此刻忽然開朗，因為，她終於找到了人生中的挪亞方舟，恭喜了。撰文：朱倬誼
《我的愛情》
關心妍（Jade）要披嫁衣了。她跟坐擁逾三億身家的35歲富商男友楊長智（Jonas）現正身處峇里島，準備在位於沙灘旁的船形教堂WiwahaChapel行禮，為她的30年人生寫下新一頁。
丟下樂壇10年苦功嫁人去，全憑Jonas的真愛打動。動身結婚前Jade接受本報訪問時，透露會在今天行禮，她說：「呢個男仔對你好嘅地步……人哋話結婚講誓言乜嘢無論你生老病死富貴疾病，講呢句好易，但係咪真係到佢有疾病或者佢唔富貴嘅時候你仲喺佢身邊呢？我成日問自己肯唔肯呢？但如果佢乜都冇晒，我都會好愛呢個人。就算佢乜都冇，佢對我嘅好，當我有80歲命，淨番嗰50年命我都未還到畀佢。呢3年裏面每一日佢嘅愛，令我改變好多之餘，亦都令我對愛情同婚姻好有信心。啲人話你冇嘢做或者成績冇咁好先咁諗啫，我諗唔會，我事業心咁強嘅人，唔會攞結婚嚟做終點，我係因為愛呢個人先結婚。」
事事關懷 愛到滿瀉
Jonas對Jade愛的奉獻，到底有多偉大？Jade笑道：「譬如最凍嘅位佢坐，最難食嘅嘢佢攞晒，最核突嘅嘢佢做晒，最難堪嘅佢乜都爭住做晒，冇一個男人係咁。我鍾意一樣嘢，唔好立亂話鍾意，因為一鍾意就有10樣。我講過一句，話『搞錯呀，我啲歌都唔識，去唱K好瘀o架。』佢就買晒我嘅所有碟，聽晒學晒。邊度有啲咁嘅人？我諗佢真係好愛我。我哋一齊三年好似三個月咁，感覺係好開心。」
蔡一智是「雙J」紅娘，二人相戀3年，今年7月底他們到歐洲旅行，Jonas在浪漫的水都威尼斯趁Jade生日成功求婚，這對基督教徒從此情定今生，執子之手與子偕老，感謝主。始料不及的是在峇里搞婚禮一頭煙，斥資300萬包起百人團已經大陣仗，還要上演攞膽的瘦身比賽。Jade形容這場賽事辛苦過做concert：「我哋兩個都要地獄式減肥，佢練六嚿腹肌，我就希望平晒，一嚿都冇，希望着衫出嚟靚。男人先最慘，佢做大量健身，瘦咗10磅。我瘦得慢，兩個零月先減6磅。」
婚後Jade計劃先享受二人世界，兩、三年後才考慮生兒育女。事業方面她還會繼續，但由全職變兼職，她說：「我唔會好似以前咁同你拼過，我應承咗佢，就算唱歌都係有意思嘅幫到人嘅，或者自己鍾意嘅先做。」
回首舊愛 只嘆機緣
入行以來，Jade公開承認的感情只有Jonas和家族經營印尼餐廳的太子爺蔣翹丞，回想與舊愛種種，她只能說是timing不合：「嗰段感情經唔起考驗，我諗係傳媒壓力。嗰時係我最失意嘅時候，又有記者影佢，影響佢生意，因為咁樣有少少分歧，佢又好忙，忙得嚟個人又易唔開心，兩個失意嘅人坐埋一齊，感情又點會好？我諗要行到開花結果，會比做到女歌手金獎要更多嘅運氣、氣力同努力。」
《我的事業》
所謂的樣樣爭少少，其實是關心妍逢一退四，即行前一步後退四步，這就是她樂壇宿命。
Jade於99年入行，她直認過去10年挫折太多，精采時間1對4，她說：「得嘅時間係紅館演唱會前，開始攞到獎、啲碟賣得，大家又接受；開頭做新人亦精采，未見過花花世界，做歌手做明星係點o架呢？但慢慢發覺原來做20樣嘢，可能得一樣嘢關唱歌事，香港歌手有得唱歌嘅機會好低啦。」
難忘急跌 天堂地獄
04年初開紅館騷前，Jade主唱的《負擔不起》和《你有心》等熱爆卡拉OK，一度和容祖兒叮噹馬頭，可惜無以為繼，更由樽頸位直線滑落，她苦笑說：「好多人都爭啲啲，有人唱歌、個樣或者運氣都爭啲啲，嗰啲啲需要好多人配合同努力。嗰時我嘅心態梗係想上，係麻木想攞一啲成績，做到最好，但係咪咁容易呢？其實唔係囉。」
到04年底，Jade直情跌墮谷底，像被所有人放棄，她說：「係慢慢冇晒人氣，好似氣球洩晒氣咁，嗰吓先最down，唔知發生乜嘢事，全世界人唔再鍾意聽你唱歌，好似我突然間好乞人憎，真係好得人驚。事緣係開完演唱會後接二連三出現一啲奇怪嘢，綁架事件、封殺事件，我開始好靜，冇人搵你做嘢。喺半年之間我由天堂去到地獄，我啱啱企完紅館個台冇耐，隔幾個月就喺內地disco裏面嘅酒吧唱喎，你諗吓個感覺幾難受。」
不再抱怨 學懂欣賞
當時BMA正值內亂，經理人林珊珊未上場，Jade得個捱字，Jade媽睇到心都痛，寧願女兒離開娛樂圈，Jade說：「好灰心o架，但捱吓捱吓又唔捨得，嗰時你唔會咁易放手，因為啱啱起步，個心仲好雄。」
後來BMA平定內亂，又到她和周麗淇傳不和，真累。其實Jade為做歌手付出無限，外界說她不漂亮，她去挑眼皮；然後四處拜師學唱歌增值，學跳舞，行性感，出寫真，甚至改變做人態度。但最後，都係爭少少。她笑，因為似《麥兜響噹噹》內的麥仲肥，幸好她夠阿Q，不抱怨。她說：「我唔勤力根本唔會生存到！」
Jade有料但冇獎攞，謝安琪卻可走住音上位做天后，Jade唔恨也不羨慕，她說：「我只會戥佢開心，前好多年就會『有冇搞錯呀佢又上？我又冇。』咁樣諗嘢其實好辛苦，你應該欣賞佢嘅優點，其實係你唔放過你自己之嘛，去妒忌人，最唔開心嗰個係你自己。」
攝影：葉君海、黃偉雄
場地：Hair
化妝：AbbyChoiofHair