高鐵新時代，年底將可以飛馳於時速350公里的國產子彈火車上，輕鬆往返廣州武漢，車程由10小時縮至3小時，將來銜接港高鐵後，加多兩小時就落到香港。泛珠三角進一步融合，官方預期鐵路沿線20城市近一億人口將受惠，盡享此5小時經濟圈的便利。
前日講過，正在招股的恒大地產（3333）為整靚靚上市，不惜天價於廣州天河區搶地，但傳聞要退回給市政府，賠了夫人又折兵。相反有兩個發展商早着先機，05年已於湖北武漢以天價買入市中心靚地，如今配合高鐵發展，可謂如虎添翼。
邊個咁有遠見？先係世茂房地產（813）以超過31億元人民幣（下同）打低和黃（013）、浙江綠城等投得漢陽鸚鵡洲地皮，刷新當時地王做價；而瑞安房地產（272）喺兩個月後，用近34億元買下漢口永清靚地。
早年武漢買地將收成
兩家發展商當年天價投二線城市地，引起市場嘩然，但經過幾年發展，終於修成正果，世茂的「錦繡長江」每平方米均價賣1.05萬元，而瑞房的「武漢天地」售價已去到1.2萬元。
當年冇人敢信每方米樓面地價近2000元，今時今日回報會咁豐厚。不過有傳世茂項目第二期銷售慢咗，反而瑞房武漢天地住宅御江苑，年頭開盤至7月已賣近300伙，叫價企硬1.2萬元。
項目建築面積約145萬平方米，有Office商場住宅全套，預計2014年落成，配合埋京港高鐵屆時已接連南北2360公里的「四縱」鐵路網，東至西的「四橫」鐵路配套，何止人流，連物流都路路暢通。作為南北交滙點，武漢等二三線城市地位將大大提高，深明此道的發展商早已買地落釘認真發展，而唔係任由地王鋪草皮。
講開「四橫四縱」發展，仲有一條大線係青太客運專線，年底動工，3年後青島至太原只需5小時，快足7個鐘。股價逢跌都見大手攞籮嚟裝的寶龍地產（1238），將會喺青島起「樂天世界」咁款嘅綜合項目，眼光都有番咁上下，睇嚟重組中的越秀投資（123）要加把勁，期望後發先至。
胡孟青