立法會大樓係百年古蹟，入面啲設施都有番咁上下歷史，噚日上晝11點半左右舉行財經事務委員會會議時忽然停電，好彩有後備電照明，唔使摸黑開會。但會議廳冷氣同會議語音系統就暫停運作，官員、議員無咪用，發言時要調高分貝，好似巴士阿叔咁講嘢。
立法會秘書長吳文華話，因為跳掣引致停電，未知事故原因，已聯絡機電署搶修，初步估計係因為電錶房跳線，佢指大樓電力裝置有廿幾年歷史，或因系統老化出事，會加緊維修，希望今日回復正常。停電期間，有三個會議改到其他會議室進行。雖然停電無嚴重影響議會運作，有議員認為要考慮做兩手準備，萬一開會時停電如何應變。