張智霖經常孖住老友郭富城、I.T老闆沈嘉偉等篤波、鋤D，講男人經，近期又拍劇、準備出唱片。獨力湊仔的袁詠儀之前已經笑言造人大計獨靠「單性繁殖」，昨日出席活動更指怕老公玩到死，而聲稱好忙的張智霖，更謂行房要排期。
袁詠儀昨日在圓方出席Lancome眼部精華活動，她為任模特兒的華姐苟慧雲做眼部按摩。悉心打扮的靚靚，笑言要努力keep住靚，她說：「老公keep得咁好，做佢身邊人點可以唔keep？萬一有乜事，啲人唔會怪男人，只會怪個女人，我唔可以輸蝕畀佢，所以要同步。」
「驚佢玩到死」
自言會在家做facial的靚靚，卻懶理老公張智霖，她說：「唔幫佢做，由得佢乾，有時見到佢甩皮，咪可憐佢畀啲cream佢搽，唔可以畀佢咁後生，要搞到佢殘，佢玩到幾夜、捱到幾夜，都由得佢玩。」她謂以前會陪老公出去玩，因為老公太爛玩，現在寧願留在屋企。
靚靚說：「我驚佢玩到會死，因為有次我開朝早06，佢都出咗去，我收工下晝4點佢都未玩完，超過20個鐘頭，我要去南華會接佢走，我同郭富城講，唔好生，唔係生咗，唔使瞓㖭。」
「有排未榨乾」
無綫劇集《富貴門》周初開播，聲勢未及另一台慶劇《宮心計》，更有指靚靚和郭可盈不和，靚靚就指有SMS問候大肚的郭可盈，叮囑她多吃補充營養，郭可盈則回覆多謝關心，更祝靚靚追到個女，否認不和。
此外，張智霖前晚到將軍澳電視廣播城錄影《勁歌金曲》，對於太太靚靚早前指他忙於工作，精力被榨乾，未能生BB，他說：「我有排都未榨乾呀，我係壯男，生BB呢啲隨緣啦，但呢排工作真係好忙。」問行房是否要與太太排期？他笑說：「絕對要。」
採訪：LawWaiMan、GraceHo
攝影：EdwardChou、DickyChan