立法會主席曾鈺成下個月又再小登科，佢噚日出席生活易一個活動時同八方講，雖然唔係第一次做新郎哥，但心情都仲係好緊張，同每次參選一樣咁忐忑。阿曾下個月喺會展行禮，派咗七百幾個紅色炸彈，希望到時順順利利咁話。佢又話婚後太太會繼續跳舞同教書工作，暫時未諗到去邊處蜜月旅行，最快要到12月尾立法會休會先可以過二人世界。
多得林D9提「動議」
阿曾講開又講，話之所以結婚要多得「人肉錄音機」林D9局長多事先搞得成。事緣今年初立法會同官員新春午宴期間，林D9突然提出「動議」，要求涂謹申同曾鈺成今年內成婚，因為婚禮可以振興經濟云云，當晚阿曾就打蛇隨棍上求婚。
阿涂亦密鑼緊鼓籌備婚事，註冊儀式同擺酒分兩日搞，佢透露預計酒會連酒席要派八百至九百張帖，家陣最擔心印刷商唔能夠準時起貨，所以對於曾鈺成緊張心情，佢話感同身受。阿涂係傳媒之友，好多行家都想親自到場賀佢，由於多數記者晚上忙於趕稿，有行家笑言去飲當晚可能要「總遲」。