中國公佈多項重要經濟數據，不過冇乜驚喜，但全年經濟要「保八」的任務，相信如無意外可以達到。港股昨日低開後持續回吐，一度跌近22000關口，但低位有買盤入市，令跌幅收窄至107點，收報22210，成交近700億元。
個別半新股近期表現算交到功課，其中較搶鏡有澳優（1717），昨日再升4.1%，收報5.63元，比招股價4元已累升4成升幅，表現比唔少同期上市新股好。稍後仲有唔少新股排隊上市，其中一隻係下個月上市之中糧包裝，其姊妹公司中國食品（506）昨日爆升，創一年新高6.35元，收市報6.20元，逆市大升7.8%，唔通為中糧包裝造勢？
中國食品業務四平八穩，公司上半年盈利按年升25%至3億元，旗下糖果及飲料業務收入較佳，綜合毛利率提升至28.5%，反映經營情況有改進，後市可待回落至6元水平買入，短中線目標7.20元。
方星俠