噚日中央出咗第三季經濟數據，確認已經踏上復蘇之路。其實敏妮隔日就收到編輯話：「今日稿擠，《敏妮Talk》暫停一天。」已知個市好番，唔係邊得嚟咁多廣告噃！
敏妮上嗰篇文章，講到用手機收廣告有1蚊賺，咁耐敏妮只係收過1條，即係賺咗1蚊，得啖笑。不過流動網絡嘅商機真係無限，敏妮上個禮拜出trip，認識咗班tech人，先至深深覺得，自己原來生存喺「石器時代」。雖然係咁，但可能喺網絡世界，大家習慣認識唔同嘅朋友，大家傾傾講講，好快熟絡。亦係咁，敏妮明白網絡嘅動員能力，點解會咁強咁快咁廣。
藉網友試新產品推廣
呢一點對於好多企業嚟講，係一個商機。公關朋友同敏妮講，好多時啲生產商有新產品推出，都會搵人試吓，一來做吓推廣，二來可以測試市場反應。由於越來越多人玩Facebook、Blog等，所以佢哋就透過呢啲渠道，搵網友試新產品。
以為佢哋一定係試手機、軟件等新科技產品，錯！公關朋友講，BB尿片、奶粉，都係搵Facebookfans、blogger試用，等佢哋喺自己個網上地盤講番用後感受。呢一招真聰明，家陣啲消費者鬼咁精，你賣廣告硬銷，大家未必信，但身邊朋友話你知好唔好用，就信嘞！
網上商機無限，唔單止係商業層面嘅商機，對一般投資者亦都係投資亮點，就好似敏妮同股壇前輩講番今次出trip收穫時，佢即時話，要留意吓啲科技股，尤其做application嘅公司。又係嘅，搭地鐵成日見到隔籬乘客用iPhone上網，比起2000年科網股時代，家陣科網嘅應用會更實際，認識多一啲科技公司，唔難發掘到新投資機會。
溫敏妮