新地（016）最新年報出爐，華華最關心係董事嘅薪酬有冇大變，舊年經濟環境唔好，大家減少少人工在所難免，奇就奇在，明年一月退休嘅執行董事黃奕鑑，竟然被減人工30%，總薪酬941萬元，喺7名執董入面減幅最大。前年黃奕鑑喺董事局入面人工第二高，但係舊年已跌落第三，俾另一位執董陳鉅源爬過咗，陳生舊年年薪1025萬元；而最高薪仲係執董黃植榮，舊年薪酬1384萬。
黃奕鑑總薪酬大減，因酌情花紅減咗73%，由前年921萬元減到得252萬元。老闆郭氏兄弟喺佢臨走前先至狂減佢人工，唔知佢哋之間係咪有芥蒂呢？
其實新地今年中宣佈黃生退休都嚟得有啲突然，黃生喺新地做咗28年，話晒係兩朝元老，話就話退休，但實情佢今年得57歲，都未到退休年齡；佢當時仲發聲明話，幾年前已經準備退休，希望多啲陪家人。總之，成件事有啲耐人尋味。
冇做執董 郭炳湘僅收13萬
黃生兩位老闆、新地副主席郭炳江同郭炳聯，舊年都減咗56%花紅，總薪酬分別係206萬及223萬元，減幅約2%。至於舊年5月底調任非執董嘅郭炳湘，冇得做執董人工當然少咗，由284萬減到得番13萬。咁佢又有幾積極參與公司事務呢？上年度4次董事局會議，佢只係出席咗兩次咋。
李華華