很難相信周中歐聯戰果，巴塞與皇馬齊齊輸波已難，更難是兩支西甲班霸竟同於主場敗北，這種例子少之又少。
周二歐聯爆冷頻頻，甚麼烏尼雷亞大炒格流，基輔作客聖西路都唔使輸，最離譜當然是巴塞於魯營不敵魯賓卡山，捧場客無不大呼：「今晚搞咩呀？」伊巴謙莫域賽後竟然用「欠運」回應記者，人家魯賓卡山是歐聯初哥，誇張講句巴塞就算10個對11個，在魯營也理應至少贏兩球。欠運？伊巴咪玩啦！
巴塞輸無沙維？
身邊友人問畢傑，巴塞何以會敗北，老實我又怎知最主要元素？美斯替阿根廷搏完兩場世盃外，露疲態非藉口而是事實，但應也不致於落敗。
西班牙國民同樣氣憤，不明99.9：0.01的控球比率（當然是失控想出來的比例），巴塞為何仍不能扳平或反勝。好多嘢都解釋唔到，足球賽事就是如此。或者替巴塞找個輸波藉口，沒有沙維吧。
皇馬防線仍發夢
第2日輪到皇馬出場，大好形勢下又反輸AC米蘭，又是於巴拿比奴主場輸波，彷彿西甲隊突然在這周沒落。歸根究柢，皇馬發夢防線未改，對華拉度列失兩球，對AC失夠3球；施多夫企定定數秒後先傳中，柏圖便足足幾秒冇人mark入奠勝球。卡斯拿斯也是人，連他自身水準也開始飄忽，還能助皇馬救出多少球？
文：畢傑
本報名家
電郵：[email protected]
逢周二、五見報