披圖嫁女，新郎以前做牛仔褲生意。據披圖講，佢認為牛仔褲生意已係「舊經濟」，而未來前途係「新經濟」，講吓講吓就說服咗女婿轉行到環保業。好嘢噃，環保夠時髦，夠綠色，又可以發大財，事在人為啫，睇吓美國前副總統戈爾就知道啦，下台後憑佢嘅知名度，周圍宣傳全球暖化，憑演講、網站、紀錄片，等等，已賺得上億美元收入，比克林頓富有得多。普通人唔可以學戈爾，但可以從中取得靈感。又睇吓比亞迪（股票編號一二一一）製造電動車電池，得畢菲特睇起入貨，股票就由八個幾升到現時嘅八十幾，畢菲特繼中石油之後，又試賺到笑。比亞迪說到底，係一個環保汽車概念股啫。
人地早着先鞭，憑環保概念發財，我地唔恨得咁多，披圖信足董慕節，或者早已胸有成竹，認定女婿應該從事環保業都未定。十月十八日晚，男女家在君悅酒店擺酒，披圖遊走全場招呼客人，鬼咁風騷，上台講話，亦幽默風趣兼而有之。佢位親家、新郎父親蔡先生要睇住稿紙嚟講，以為會悶啲，點知講到婚姻時，佢話教仔如此："Marriageisallaboutgiveandtake.Thehusbandgivesandthewifetakes."全場哄然大笑，現代女士可能唔會同意，但如果乜都係丈夫畀晒，太太收晒，做太太嘅幾安樂呢！至於蔡先生之語帶雙關，自己揣摩可也。
宴會上碰到披圖有份嘅團體馬「正本仁心」嘅練馬師蘇保羅，左丁山同佢講：「你隻雅雪在印度新年之日成為大熱門，竟然落第而回，班印度人馬主真係人人心律不正常，我亦輸到心律不正常。」蘇保羅話：「我到家都仲未恢復心律正常呀！」跑馬就是這樣的，冇運氣好難贏馬。披圖曾經講過「正本仁心」隻腳有啲事，故此轉入蘇保羅馬房慢慢療傷，好番之後必然有馬贏，一於聽住先，希望「正本仁心」或到時成為熱門，會保持心律正常。講到心律，突接記者電話，知道希慎主席利定昌突然於十月十七在家逝世，原因不明。人生無常，想起去年曾在醫院碰到佢，大家非常好傾，佢當然係精神奕奕啦，五十五歲咋，點解去得咁快嘅？不免有啲驚驚哋，此夕何夕？披圖嫁女好日子也，遂有對酒當歌，人生幾何之嘆。