成班中環人一齊吃午飯，講起慳電膽事件，原來冇一個相信曾特首會笨到圖利他人，特別係輸送利益畀佢親家，慳電膽事件應係無心之失，亦係特首辦及環保局嘅政治觸覺差之故。呢次因小失大，都唔知邊個要孭鑊。當初係環保團體向政府施壓嘅，我地呢類市場派期期以為不可，以我地嘅原則，當然反對政府強制性推行慳電膽。想不到的是，政府聽從之後，竟然俾一啲環保團體砌到暈。慳電膽內含水銀，早已有人指出，但環保團體當時避過不提，現在將近成事嘞，環保人士即刻跳出嚟話慳電膽有毒，真搞笑，乜都係環保人士玩晒，講晒。
講起特首親家，姓莫名錦泉，中貿林話：「佢係我嘅中學同學，同級唔同班！」乜又咁啱嘅！莫錦泉後來入咗浸會書院，讀工管系，曾擔任學聯會幹事，畢業後慢慢創業，白手興家，係一個浸會畢業生之商界成功故事，想唔到因為佢嘅千金嫁咗畀曾特首位公子，竟然落得今日咁尷尬，中貿林戥佢唔抵。浸會大學籌款，曾有同學要搵莫錦泉幫吓手，但發生呢件事之後，好似聯絡唔到噃。
要環保，講慳電，冇理由干涉人家用甚麼電燈，或者走火入魔咁學習加州禁售四十吋以上嘅電視，最有效嘅方法就係加電費，等啲用家肉痛，自動減少用電，不過香港有電力公司利潤管制協議，事情比較複雜，但仍然可以推行嘅，左丁山想出一個粗略大概：（一）找出兩個數字：（A）居民每月用電度數嘅過往一年平均數，（B）商用電力用量平均數，機場、地鐵呢啲特大戶嘅數字不計，（二）用電等於或低於平均數者，電費照舊，（三）用電量高於平均數者，以五十度為一單位，逐個單位增加收費五毫。例如假設用電平均係二百度，電費照現價計算；用到一千度嘅，一千減二百等於八百，除以五十等於十六個加費單位，每單位（五十度）加一角電費，第九百五十至一千度電嘅每度電費就係現行電費加多一元六角。如此一來，居民仲唔自動自覺去買慳電膽或者使用其他省電方法？咁嘅加費制會唔會增加電力公司利潤？一切要睇吓居民慳電程度而定，事先難估計，但政府可以按協議辦事，等電力公司可以賺到保障利潤，但唔會得到因加電費而得到嘅額外利潤。