放完悠長暑假，立法會噚日重開會議，可能一時間未習慣又要去開會，結果有兩個官員遲到，搞到會議三個鐘頭內兩度休會約10分鐘。
工業界立法會議員梁君彥提出口頭質詢，建議港府放寬穿梭中港人士兩地繳交薪俸稅規定，負責回答嘅財經事務及庫務局局長陳家強回應話，現行規定行之已久，符合國際慣例，目前無充份理據更改，官員答得「行貨」，僅得一個議員林健鋒跟進追問。
曾鈺成好寬容
一般情況下，每個口頭提問會有約20分鐘時間畀議員、官員問答，忽然間草草了事，搞到其他人大失預算，負責隨後議程嘅食物及衞生局局長周一嶽同民政事務局局長曾德成，兩個都遲到，趕唔切去立法會，主席曾鈺成惟有宣佈休會，等齊人先續會。
以前做校長嘅曾鈺成可能見慣學生長假期後遲到情況，所以對官員都好寬容，笑言新會期開始後，議員都已經積極投入工作，不過官員似乎未習慣，兩個官員則為遲到以致阻延會議道歉。政務司司長唐英年話關注事件。