白鴿黨李華明每年施政報告後，例牌舉行地區諮詢會收集意見，可是今年施政報告實在太冇料到，八方相信冇乜正常人可以隨口講出六大產業係邊六瓣，齋聽六大產業已經悶親街坊。肥仔明都知呢壇嘢趕客，恐防今年諮詢會拍烏蠅，因此創先河喺諮詢會前加插粵曲表演，唱完大戲佢先攝場出嚟講幾句施政報告。
猶幸師奶大叔聽完粵劇冇即時起身，對於施政報告意見，一面倒勁插換慳電膽措施擾民，原來好多街坊用光管，換慳電膽要破財。沒有調查就沒有發言權，肥仔明去樂富邨同翠屏邨考察，發現樂富慳電膽貴普通光管四、五倍，翠屏根本冇得賣慳電膽，因為貴到冇市場，難怪街坊對呢個措施咁抗拒。