PS3版《GT5》嚟緊3月等唔等到仲係未知數！等唔切可以諗XB360《Forza3》止癮；今集畫面、操作都作大幅提升，更難得車身損毀系統比上一集更真實，連本身冇車牌嘅DaDa同A.Lin都忍唔住要試玩，卒之炒到損手又爛腳！
記者：陳國輝
攝影：陳陶鈞
翻轉豬肚再彈起
如初學者領教過《GT》，可能以後都唔敢揸車！太難控制！相比下《Forza3》算輕鬆得多。筆者對賽車Game感覺不太強烈，正常劈到彎、Keep得住比賽嗰種緊張氣氛已經心滿意足。試玩十分鐘，遊戲算係其中之一，但賣點應不在於咁穩妥嘅操作感覺，而係已獲提升嘅車身損毀系統。
比賽炒車？好平常！小則好似車身與車身嘅磨擦，大鑊嘢例如炒車，甚至翻觔斗，每一次損毀，除造成表面傷痕之餘，更可能影響軚盤以至引擎等正常運作，從而影響比賽成績。嚟到今集，再加入好慘烈嘅180度翻肚場面，試過開足200公里然後勁炒埋牆，翻肚不突止，逼真到玻璃都碎晒！不過咁，事後筆者發現有好多「蝦碌嘢」，例如當架車翻咗肚，原來你上下左右推個搖桿，車身會做出鯉魚翻身動作，又繼續比賽；而當爆玻璃後再選用第一身視點作賽，塊玻璃又變番完整無缺。講到底，如果想知道自己架車炒成點，睇Replay啦！
新手老散齊齊鍊
假如咁勁俾你打爆晒《GT》，呢類玩家應該一早就升呢！但係，唔會人人肯花咁多時間煲Game，新手入局，應該由基本開始；《Forza3》一開始俾你揀架7人車作賽，仲唔使逐一考牌，即時落場就鍊得，夠晒爽快！
更搞鬼嘅係，呢一集特別加入自動煞車系統（Auto-Braking）以及即時倒帶（GameplayRewind）功能，例如到某個彎位嫌劈得唔靚，你可以倒帶再嚟過，直至滿意為止；對於老散而言，相信最啱玩係網上挑機模式，透過XboxLive!最多可8人同時比賽，贏咗仲可以搵錢幫架車改裝同拉花㖭！
Profile
平台：XBOX360
開發商：Turn10
類型：Racing
系統支援：1080p、DolbyDigital
語音：英文
字幕：繁體中文/英文
人數：1-2（Offline）2-8（Online）
