中大新校長候選人沈祖堯教授等待上任，現任校長劉遵義倒數日子起身。劉遵義上任後惹來好多非議，唔少學生、教職員及校友都對佢有意見，更有人成立「劉遵義施政監察」向佢問責，八方聽聞幾個月前校內有人作出大膽建議，提出在校內裝設一個倒數鐘，倒數劉遵義下台日子，就好似幾年前有人喺灣仔安裝一個董建華任期倒數鐘咁，後來老董腳痛提早下台，個鐘提早功成身退。
據八方了解，劉遵義倒數鐘基本上萬事俱備，技術上絕對可行，裝置地點都唔成問題，只待學生組織同意就成事，但近幾個月校內氣氛忽然十分河蟹，倒數鐘呢份大禮被河蟹咗，胎死腹中不了了之。