張學友噚日去到澳門新濠天地HardRock酒店，為以佢做主題嘅搖滾巨星套房主持揭幕儀式，佢係全球第一位華人歌手有自己嘅主題房。主題房入面擺咗學友喺演唱會用過嘅咪、戴過嘅帽、唱片、大型海報同一個白色三角鋼琴。
輔導囡囡上網
學友話成間房佢最鍾意係個鋼琴同旁邊有四張大海報嘅位置，因為覺得好有平時喺屋企廁所練歌嘅感覺。酒店又將部份雞尾酒以學友嘅歌名好似《太陽星辰》、《李香蘭》同《月半彎》嚟命名。
講開家人，學友話囡囡呢排仲忙過佢，所以未知幾時同家人一齊嚟住吓呢間房。對於近日關楚耀被前黑澀會美眉Mika將親密照放上網，學友話有睇過報道，仲話：「後生仔拍拖好正常，但決定做呢行就要有啲犧牲，凡事小心，都冇話利用唔利用。」學友話囡囡開始上網搵資料，雖然有安裝過濾軟件，但佢都會在旁輔導。
學友又話會同囡囡講唔好將啲相放上網，佢話：「放上去就預咗俾人知，影得就會俾人見到。」
