由王晶執導、蔡卓妍（阿Sa）、吳君如同埋詹瑞文等主演嘅喜劇《美麗密令》，噚日去咗廣州番禺長隆酒店舉行記者會，仲安排咗李曼筠（動漫Maggie）、高海寧、梁政珏、林佳菱着上三點式泳裝示人。
詹Sir扮志雲
由於四女個個都波濤洶湧，即時將身材平平嘅阿Sa同吳君如比下去，就連影大合照時，阿Sa都俾佢哋嘅巨咪搞到面紅耳熱，尷尬萬分，而一向愛扮鬼扮馬嘅詹瑞文，仲化身「志文大師」，又擺陳志雲上枱。
阿Sa今次喺戲中扮演卧底女警，有唔少打鬥場面外，佢喺片中仲會破天荒以三點式示人，佢話：「有啲係三點式，有啲就唔使，同場個個都好勁，我都好耐冇着三點式，之前拍嘅時候同啲女仔有身體接觸，我要面貼胸，感覺軟腍腍同暖笠笠。」不過當講到喺身材方面輸蝕咗少少時，阿Sa即抵死拉埋君如落水，仲話有君如喺度就唔驚喎，而且阿Sa覺得大家都有身材，只係大細之分，佢仲自爆係Acup，又踢爆晶哥每逢拍泳衣戲時就會喺現場得好實。
晶哥捧新寵
對於被阿Sa踢爆，晶哥就哈哈大笑話：「一貫嘅我，唔緊要，唔通王晶仲想做君子咩？」晶哥透露已簽咗有「小舒淇」之稱嘅林佳菱，大讚佢有潛質，唔怪得喺現場唔見佢嘅愛將孟瑤，似乎晶哥將會力捧新寵。
此外，樊少皇喺片中會扮演乸乸哋嘅男仔，佢透露之後要趕拍《葉問2》，又會參演《葉問前傳》。