唔知點解，香港有好多人鍾意潑冷水，一啲事情提上議程，仲未開始，已經有噓聲來自四方八面，譬如話教育產業、搞私立大學、搞招攬海外精英尖子來港讀博士、搞醫療產業等等項目，已有人批死唔掂。其實駛乜咁封閉呀，做咗第一步先，你估實死梗嘅咩。私立大學好難辦，人人都知，但如果唔行咗第一步，撥地興建校舍，第二步永遠踏不出。樹仁經多年奮鬥，今日已成為第一間私立大學，回想二十世紀八十年代初，鍾期榮博士人老、錢不多，堅持四年書院制，唔肯辦三年制向政府攞津貼，幾多人睇淡樹仁呀，家咪幾掂？如果鍾博士俾啲冷水嚇怕咗，焉有今日。
有議員及評論員講「博士研究生計劃」係「為他人作嫁衣裳」，大潑冷水，又是一例。肥仔K見到呢啲評論，覺得幾好笑，香港人成日講話要有國際視野，但一做起事來，就攬住內向保護主義不放，驚死益咗外國人。諗真吓，有大把香港人得外國獎學金在外留學、做研究，然後返嚟香港o架，乜調轉頭我地用獎學金延攬他國尖子，就咁眼淺？肥仔K攞日本納稅人嘅錢（文部省獎學金）住在日本讀書研究三年，讀完就返嚟香港，日本人何嘗不為香港培養人才？日本人何來有「為他人作嫁衣裳」之嘆，每年仲不斷加緊派獎學金爭取外國學生留日㖭；德國咪一樣以DAAD獎學金吸引外地生到德國，當年左丁山就申請過，但係俾上司拒絕咗之嘛。奉勸啲尊貴議員一句，香港要做國際一流城市，唔係做中國境內的一個大城市，政府與議員要有啲國際視野，國際胸襟先至掂，唔好下下話要維護香港人利益，我地唔駛保護主義嚟保護！左丁山攞過獎學金往外地，讀完書就即刻返香港，人地從來都冇問過左丁山「做工三年」作為回報，故此覺得香港既然有財力招攬外國學生，以外國生嚟刺激、挑戰本港教授、學生，實在大大有助於本港學術水平之提升，以及激發本地生多啲認識外國人文化習俗及多用英語，實在係一個好主意！