召喚魔髮　四眼索女打天使

召喚魔髮　四眼索女打天使

法力強勁、嘴邊有粒銷魂癦，唔係講重播《西遊記II》件鐵扇公主陳秀珠，而係索好多嘅古代魔女《Bayonetta》；遊戲是DMC之父神谷英樹新作，力Sell華麗連擊快感，兼用魔髮召喚魔獸嚟打。

文：阿洛

頭髮靚晒WhoamI

從前歐洲有兩個擁有超然身份嘅神魔種族，分別係掌控光明嘅賢者同掌控黑暗嘅魔女，某日唔知為咩突然翻枱開拖，最後同歸於盡。主角Bayonetta係魔女倖存者，不過沉睡喺湖底20年後醒番玩失憶，連自己個名都唔知，淨係得番可以操控猙獰魔獸嘅魔女之力。踏上尋回記憶之旅，不斷出現天使襲擊佢，到底最後會點呢？係咪信主得救？又使唔使返禮拜堂呢？

■眼鏡御姐Feel，請用力調校我。

■呢個Biker，係佢嘅宿敵。

■打Boss最後一擊可以召喚魔獸。

我想報失啲頭髮

主角係魔女，敵人自然係天使，不過Game入面啲天使唔係噴水池吹喇叭小便嗰隻，個樣係怪形怪相、凶神惡煞到極點。遊戲背景都係華麗哥德式風格；講真玩法同畫面都好似《DevilMayCry》，新意係女主角唔只雙槍在手，雙腳對長Boot都係槍，而且頭髮仲係佢嘅魔髮泉源，連佢着緊套皮衫亦係用佢嘅頭髮變出嚟，所以召喚魔界拳腳、刑具同魔獸嚟SM敵人時，佢啲頭髮就會唔得閒遮住佢個身體，係牽強咗啲，但我唔介意。

■頭髮變召喚魔女長腿，留意主角好Sexy。

■魔女加Chopper電單車，好襯！

■仲可以召喚出魔界刑具，SM敵人。

■天使敵人，個樣好邪惡。

■唔係啩！連飛機都召喚到？

■巨型Boss唔少得，場面壯觀。

魔女時間通街執嘢玩

系統方面都有啲新意，有個特殊技叫「魔女時間」，發動之後敵人會變慢動作任由宰割，絕對係玩家嘅HappyHour。除此，主角仲可以執敵人嘅武器自己使，攻擊方法變化會好大。隻Game月尾出，但家PS3同Xbox嘅日本Store都有得Download體驗版，玩過PS3版本，確係似DMC咁爽，而打大Boss後就可以執佢把超巨大斧頭，大大力車埋去班敵人度！

■招式組合多變，亂㩒都有華麗連技。

■大量武器更換，仲可以執敵人嘅架生。

■電鋸都出埋，玩過體驗版就知幾血腥。

Profile

遊戲：《魔兵驚天錄Bayonetta》
機種：PS3
製作廠商：PlatinumGames
發行廠商：Sega
類型：動作
人數：1人
推出日期：10月29日