發財要立品，千祈唔好老點人，唔知唔識寧願唔講，但不平則鳴的，非恒隆地產（101）主席陳啟宗莫屬。陳啟宗係第一個行出嚟公開質疑豪宅天價成交嘅公眾人物，問佢豪宅升勢堅定流佢話︰「唔好信得晒，買得起都唔係儍仔。」
最引人入勝嘅係佢話︰「豪宅仲有冇得升要睇基數效應，恒隆賣幾多錢就公佈係咁多錢。」弦外之音唔使多講。的確，升幅係睇基數，如今個別豪宅已挾升至7.1萬元一呎，再升幅度唔大，即使升到7.3萬蚊呎，升唔夠3%，但從炒家利潤角度出發就有超過1000萬元進賬，認真和味。
地產發展商當然希望樓市暢旺，好少會唱淡樓市。所以陳啟宗自己都笑言，一向唔做樓市預測，佢認為出自發展商把口冇意思，認真坦白。
良心地產商肯講真話
另邊廂卻有發展商急發資料，話樓市仍健康，豪宅升勢冇引起炒風，強調05年至今供樓負擔比率一直維持低於35%水平，而且物業成交多集中於200萬元樓下上車盤，成交量平穩，而去年底本港有5.3萬個空置二手單位，顯示供應仍充足。
資料雖足但就有啲「蘋果同橙比」，若說成交集中200萬元樓下單位，只說明轉手率高，因空置率無大降，就唔係多咗人需要住樓，成交升，樓價升，有炒賣的誘因至係主要原因。金管局亦與銀行商討，雖然未至於阻止銀行做生意，但希望銀行在風險管理上能未雨綢繆，避免樓市泡沫擴大，市況會變得凶險，甚至重蹈97年的覆轍。
同樣係表白嘅仲有一眾大孖沙對恒大地產（3333）成功上市的支持，陣容熟口熟面，有冇留意早前中策（235）夥拍博智競標台灣壽險一哥南山人壽？單刁背後嘅大孖沙又係呢幾個富豪，今次有埋長實（001）支持，招股反應肯定有番咁上下。
係咪入飛，除咗公司資料仲要睇管理層。今次發行15億股中，超過6億股係舊股，主席許家印去年為上市前化妝大灑金錢，天價41億人仔投得廣州天河區地王，有報道指要退番畀政府，上市如意算盤又唔能夠如期打響。有啲擔心咁博嘅公司文化，長遠點保護股東權益。
胡孟青