關心妍（Jade）和未婚夫楊長智（Jonas）將於峇里舉行孖J婚禮，一對準新人昨日一早坐飛機，飛往當地準備。準新娘Jade穿上紅色外套再戴上訂婚巨鑽，神采飛揚，而新郎哥Jonas面對記者時表現怕醜，當記者要求他錫Jade一啖時，他竟第一時間逃入禁區，上演走佬俏新郎。
關心妍和未婚夫楊長智即將在峇里舉行婚禮，昨日一早兩人帶着5、6箱大行李，由助手陪同下到達機場，坐早機飛往當地準備。雖然要一早起身，但準新娘Jade穿上鮮紅色外套，再戴上巨鑽訂婚戒指，格外神采飛揚，而穿上灰色T恤牛仔褲，還戴上黑超的Jonas則相當怕醜，甫到場即拿行李到櫃位辦理登機手續，留下Jade一人接受傳媒訪問。由於行李超重，他們要付千多元的附加費。
或延遲婚禮
Jade表示帶了5至6套靚衫，不過未必全部穿上。由於當地天氣不穩定不時落雨，故原定在戶外舉行的婚禮儀式，如落雨便會返室內進行。Jade一臉興奮說：「噚晚為咗將件喺美國訂做嘅婚紗，收入行李度都搞咗成兩個鐘，因為裙底會撐起，我怕會整爛，所以要好小心。」
Jade表示原定婚禮在周六（24日）舉行，但由於當地早前發生地震，加上近日天氣欠佳，若果有需要則會延遲至30日，若果在30日舉行，預計自己及前往出席的親友在下月2日返港。
為了準備婚禮，Jade連日冇覺好瞓，心情緊張之餘又擔心帶漏物品，家人不時叮囑她記緊帶結婚戒指。由於當地保險未必包保貴重首飾，故Jade不敢帶太多名貴珠寶。問Jade婚禮會花費多少？她表示未知道，因可能要增加部份安排，故此要加費用，但一生人一次，比預期多出一點費用也沒所謂。
兩年後生育
問她婚後是否立即造人？她笑說：「唔會住，雖然媽咪同奶奶都想，但我同老公想過吓二人世界先，兩年後先生BB，到時我都係33、34歲，家我都唔識湊。」下月Jade和老公會返港搞派對和朋友慶祝。
訪問完後，記者要求Jade和老公合照，兩人十指緊扣，但當要Jonas錫Jade一啖時，他即怕醜地走入禁區，留下Jade一人和記者講拜拜。
採訪：張俊銘
攝影：陳俊強