律師會會長王桂壎為人風趣，八方噚日有機會同佢同枱食飯，席間佢大放笑彈。王律師咁識搞笑，可能同做過童星有關，加上「冷面笑匠」許冠文係佢中學科學科老師，當年上堂時許冠文好似做戲咁，噚日王桂壎示範許冠文《雙星報喜》中招牌手震震動作，真係有九成似。
曾志偉係同級同學
就讀於聖芳濟書院嘅佢，近朱者赤，同級同學有另一位諧星曾志偉，當年志偉喺屋企搞party，王桂壎係座上客，佢又記得志偉踢波最鍾意扭足全場唔交波，其他同學相當無癮。王桂壎母校可謂星光熠熠，歌神許冠傑係佢學兄，當年校內幾乎人人夾band。另一大師兄仲犀利──就係李小龍；王桂壎對佢一身結實肌肉，歷歷在目。讀大學時王桂壎做兼職教師，學生之一係鄭裕玲，佢話嘟姐當年成日走堂，掛住去佳視學做戲。
上禮拜有專業人士向煲呔投訴買唔起樓，噚日律師飯局樓市係必然話題，有律師指豪宅癲價多得阿爺放水，事關中央投入4,000億元救市，有辦法嘅人士將百分一資金轉來香港，都輕易煲爆香港樓市啦。