歌手陳慧琳（Kelly）今年7月剖腹誕下蝦餃仔劉昇後，沉醉湊仔樂，她昨日開壇寫blog，張貼夫妻操刀拍攝、囝囝出生滿100日的照片眾樂樂。樣貌似足老竇的劉昇勁愛笑，令媽咪掉開天后包袱為他抹便便，更笑言「囝囝嘅屎都係香嘅！」
陳慧琳在今年7月10日開刀產子，為丈夫劉建浩（Alex）誕下囝囝劉昇（Chace）。小劉昇出世時僅得6磅，但經媽咪人奶狂谷後，至昨出生103日的他體重已急升至16.5磅，變成肥肥白白，樣貌似足爹哋，一雙單眼皮更盡得老竇遺傳。
冲凉抹身連環快拍
Kelly在產後首周時曾發放囝囝照片，當時的劉昇較瘦小。上月Kelly透露BB已有12磅，並形容囝囝「下巴好得意，好似蝦餃仔，想一啖食落去」，蝦餃仔一名因此而來。由於很多fans都想一睹蝦餃仔風采，結果Kelly趁兒子剛滿100日，於昨在blog上張貼劉昇的四幀近照，以題目「蝦餃仔出世過咗一百日喇！」介紹囝囝出場，她寫道：「好開心見到蝦餃仔一日比一日長大，佢家已經16.5磅喇！大家都成日問我有冇蝦餃仔的近照，家就同各位哥哥姐姐見吓面啦！」
Kelly與Alex平日都愛為囝囝影靚相，昨她上載的照片正是夫妻珍藏作品，其中一張劉昇的大頭相由Kelly操刀，他嘴角帶笑、眼神清澈，從其眼珠中可透視舉機者是Kelly；另外又有兩張Kelly親拍的囝囝裸照，是劉昇出浴後抹乾身的連環快拍，他被毛巾遮實何B仔，手腳撐開，一張望住鏡頭眼睩睩，另一張則大笑不見眼，cute到爆。
托腮沉思蝦餃生意
Kelly又張貼了Alex的抱仔照，相中不見樣的Alex單臂抱住囝囝，着Polotee的劉昇托腮沉思，Kelly並在相中為兒子加插設計對白「我嘅蝦餃生意究竟幾時可以上市呢？」Blog上也有Alex親自拍攝的妻兒合照，淡妝Kelly抱住囝囝，劉昇雙手攤開如大隻仔扮十字懸垂，又展示圓潤肥腳。上月37歲生日的Kelly還真情寫道：「好開心今年有劉昇同我一齊慶祝生日！」
事實上，自從劉昇出世後，Kelly比前更宅女，如非工作她足不出戶，Alex同樣盡推應酬，齊齊在家享受湊仔樂。劉昇的出現令Kelly完全改變，且讓她感受母愛的偉大，昨身在內地登台的她在電話中說：「以前你要我同BB換尿片、抹屎邊度有可能，我咁鬼怕污糟，但幫自己個仔抹屎抹尿時，你會覺得屎都係香嘅。」
轉飲奶粉一日六餐
Kelly又透露BB已沒有吃人奶，只是吃奶粉，一日吃足六餐奶。劉昇愛睡愛吃，每次睡醒就會笑，Kelly看見睡眼惺忪的兒子對着自己笑時，她就覺得很幸福，不過她沒想到孩子只吃奶粉都會大得如此快，幾周前買的衣服已不合穿。由於日日抱肥B，Kelly等同每日舉啞鈴，搞到手瓜起，她笑說：「抱得個仔多，兩個手臂有老鼠仔啦。雖然個B好重，但你望住佢時就唔捨得放手，完全唔覺佢重，我只能夠爭取日間多啲抱個仔，因為到老公收工返嚟，佢就抱住唔肯放手，我想抱都冇機會。BB好鍾意洗白白，我同Alex幫BB冲凉時，BB就會笑，佢真係好可愛。」
採訪：丁寧
囝囝為重：開工念子灑慈母淚
火速收身的靚媽陳慧琳誕下蝦餃仔劉昇後，休息兩個月已急急復工，衣着打扮型過以前，不過心態卻大不同，以前事業為要，現在以囝囝為重，由便便換片片到與老公Alex爭抱BB，Kelly自言：「我只知道我冇一刻想離開佢。」就連巡迴演唱會都推晒，只接簡單工作爭取時間陪BB。
隨身帶相簿
復工初期Kelly心繫愛兒，更多次當眾灑淚，母愛澎湃。一次為雜誌拍封面照，更因記掛愛兒兩度落淚，最後經安排帶了蝦餃仔來攝影棚，情緒才平復。現在Kelly每逢出埠都要帶BB相簿以解單思之苦，出席完活動就立即回家，聽到兒子的咿咿叫聲也感到滿足。
娛樂資料庫：09娛圈BB一覽
09年婚嫁喜事特別多，呱呱墮地的BB也不少，除了陳慧琳的蝦餃仔，最受人注目要數梁洛施與徐子淇兩個千億BB。
資料來源：《蘋果》資料室
徐子淇、李家誠
徐子淇今年5月為夫婿李家誠剖腹誕下第二名千金晞兒，出世6.5磅，現已暴增至17磅，子淇笑言女兒肥到似鄭則士。
梁洛施、李澤楷
電盈主席李澤楷和梁洛施秘密拍拖年半，今年4月梁洛施在加拿大秘密誕下7磅麟兒Ethan，爺爺李嘉誠親自替孫兒取名「長治」，BB的面型和頭型與父親儼如餅印。
胡諾言、陳琪
陳琪上月初剖腹誕下7磅4安士大眼B女，囡囡肌膚白裏透紅可愛之極。
姚嘉妮、林祖輝
姚嘉妮今年4月為丈夫林祖輝誕下重6磅半女兒Kyra，BB女一頭濃髮，手腳長長，精靈又可愛。
李樂詩、Ted
李樂詩於本月8日順產誕下6磅8安士愛兒Maxton，BB才幾日人仔已接受割包皮手術，令夫婦倆大為心痛。
