換轉係以前，畢頓呢位花花公子喺贏咗F1冠軍後，仲唔攬住啲囡囡開P玩通宵咩，但呢位效力巴恩車隊嘅英國車手自從同日本索模道端謝茜嘉拍拖，即時修心養性，有女都唔願去媾。可惜道端喺日本做緊嘢行唔開，搞到佢寂寞難耐，要等女友做完嘢喺禮拜五先可以嚟慰藉佢。
夜店慶祝冇mood早鬆人
畢頓禮拜日喺巴西登上世界冠軍寶座後決定留多日，夜晚仲同老竇約翰以及車隊人員包括老闆巴恩去一間位於聖保羅叫做3p4嘅夜店慶祝，但佢只係social咗陣就走頭，寧願返酒店同女友講電話。現年29歲嘅佢話：「我好開心可以同佢哋慶祝，但我只係逗留咗45分鐘就走咗。我真係好攰，好想一個人靜吓。」
查實畢頓唔係攰，係冇mood啫，事關佢嘅日籍名模女友道端謝茜嘉唔喺身邊，搞到佢食龍肉都冇味。佢成為新一代車神後，最想同道端分享呢份喜悅，但好唔好彩道端要喺日本工作影硬照，嚟唔到巴西同佢慶祝之餘，仲去唔到英國參加佢喺禮拜三舉行嘅祝捷會。
女友要工作 寂寞難忍
畢頓話：「我同佢講好想見佢，叫佢唔好做份job嚟陪我，但佢冇應承我。而佢唔喺度，得番我一支公，真係好寂寞。我曾經要求班朋友留喺房陪我，但冇一個應承，所以嗰晚真係好難捱。要到禮拜五先見到佢，我真係等得好心急。」道端今日就25歲，畢頓仲將呢個F1世界冠軍送畀佢做生日禮物。
聽聞畢頓同道端禮拜五約好咗喺杜拜等，一齊去玩幾日，之後佢就返車隊備戰本月31號喺阿布扎比舉行嘅最後一站賽事。F1完咗之後，畢頓咪可以日日黐實道端，由車神轉咗「跟得男友」囉。