慳電膽醜聞水浸煲呔眼眉，港大民研計劃最新調查發現市民對煲呔施政滿意率由三成跌至兩成半，兩個月內顯著下跌五個百分點，反映施政報告增加巿民對煲呔不滿。其實唔like煲呔者眾，唔使做民調，上網都見到，近日網上多咗唔少倒曾言論，有人強烈要求煲呔下台，甚至發起「倒曾大聯盟」！
大嘆車公籤文好靈
高登網民噚日設計咗張特首下台海報，指慳電膽醜聞影衰香港，令香港倒退回三十幾年前廉署未成立嘅遍地貪污時代。有高登友建議將呢個設計印製成貼紙，貼勻港九新界，希望煲呔知難而退。而喺facebook網站，強烈要求曾蔭權下台嘅group近日都好熱烈咁討論慳電膽呢單嘢，有人將煲呔同梁展文相提並論，官商勾結似乎已經變成常態，又重提佢六四冷血言論，指煲呔既然不代表香港人，應該快啲落台，仲話「如果仲有一點羞恥之心，自行了斷吧」。
煲呔期尚餘一半，疑似利益輸送醜聞送佢一程變成跛腳鴨，網上有人話煲呔瀨嘢早有先兆，年初車公靈籤已預示佢無運行。當日發叔求得支下籤咁講：君不須防人不肖，眼前鬼卒皆為妖，秦王徒把長城築，禍去禍來因自招。」網民話估唔到咁鬼靈，尤其係最後一句「禍去禍來因自招」，呢次慳電膽好事變禍，咪就係煲呔自招囉！
八方唔識玄學，唔敢亂講籤文咁解通唔通，有似乎識得嘢網民則話，籤文第三句「秦王徒把長城築」，其實就係指政府全力推動上馬嘅廣深港高鐵，呢條建造成本成600億元嘅新鐵路橫跨港粵，逼遷沿線村民，搞到天怒人怨，豈不是現代版萬里長城？政府霸王硬上弓興建新鐵路，恐怕日後雞犬不寧咁話。
mailto:[email protected]