燈膽權昨晨喺灣仔狂呼三聲「抗毒」，可能係受董太啟蒙，但亦有可能係師承於西藏高僧。接近上亞厘畢道消息指出，早在煲呔尚未變身成燈膽權之前，已經因為政改、雷曼、扶貧等問題搞到腳痛。為免重蹈老懵董腳痛下台嘅覆轍，篤信風水嘅煲呔早前甘冒天主教徒嘅大不韙，向西藏密宗上師求救，希望得到如來佛祖嘅能量護身，勉強捱埋呢三年期。
犯十誡中第一誡
至於義助慳電膽推銷員求拜西藏上師嘅，據講之唔係又係幫禮賓府睇風水嘅龍景銓師傅囉。原來龍師傅間中就會去西藏取經，八方問過城中堪輿學家，煲呔若然要透過上師轉運，必須進行「加持」、「歸依」等法事。簡單講，上師可以現場或隔空念咒，煲呔就要跪喺度好似受洗咁，接收上師嘅能量。
「加持」之後，施主要每日念咒，同一句經文重複百幾次。話唔定，燈膽權噚日「抗毒！抗毒！抗毒！」咁叫，係佢自創嘅抗毒咒。佛教係講緣份嘅信仰，唔介意幫天主教徒轉運，但係天主教嘅十誡第一誡係「欽崇一天主在萬有之上」，不可有別的神。八方都唔係好相信煲呔為咗醫腳痛，甘願拋棄上帝。