在中環街市對面嘅三聯書店買咗一本高錕自述《潮平岸闊》，點知仲未開始睇啫，買咗一日已經不翼而飛，後來先知道大記者在寫字樓見到本書，一句唔該就「借」咗去，話先睹為快喎。呢本書係真真正正嘅瘦田無人耕，耕開有人爭，十月四日之前，根本銷路平淡，初版賣唔晒，之後就形勢大變啦，消息傳來，高校長得諾貝爾獎之後，出版商要連夜開車急印新版應市㖭。
大記者來電稱讚譯者許迪鏘繙譯得好好，高校長講平常事，甚為感人，希望英文原著亦可以有出版商出版，最好有中英文版同載一書，讓學生讀者閱讀名人傳記之餘，可以同時學埋英文及繙譯。咦，出版商三聯隸屬聯合出版集團，該集團目前掌舵人係中大校友，應該有得傾喎。
與大記者唔講得幾多句電話，就匆匆趕去BankersClub出席飯局，在中匯大廈通往置地廣場之天橋，差唔多例牌碰到熟人，今日咁蹺就碰到私募基金公司常務董事Ｋ，董事Ｋ話：「嘩，我呢排好high，老師得諾貝爾獎，我做學生嘅，直情面上有黃金。」左丁山識佢咁耐，只知佢一直係投資專家，金融長才，點解會係諾貝爾獎得獎人嘅學生呀？董事Ｋ話：「哈，我係中大聯合書院電子工程系畢業嘅，創系主任就係高錕，我take過佢嘅科o架，記得係有關電訊通訊嘅，我家周圍講高錕係我老師，成世人未試過咁沙塵！」哦，有機會沙塵就不妨沙塵下，本地大學畢業生上過諾貝爾得獎人嘅課，百年只逢一閏，未來六十年唔知仲有冇，你估係在芝加哥大學經濟系或加州理工學院就讀咩。
哈哈笑一輪之後，董事Ｋ講到高錕自傳，佢話不少電子系同學最近睇完，個個讚，希望中文大學將原書上網，任由下載，等大、中學生自由選讀，會好有教育性、建設性，且有益世道。左丁山話：「有版權問題噃，未必容易解決，何況本書家好好賣㖭。」董事Ｋ話：「有冇得傾呀？大家可以諗諗佢。」董事Ｋ做慣公司併購、買賣，果然腦筋快，立即想到將高錕老師自傳嘅版權收購回來，再畀讀者免費下載，大目標當然係推廣科學家之勵志故事。