特首曾蔭權變電燈男大搞慳電膽換領計劃搞到一鑊泡，民望裂口插水，惟有即刻轉移視線搞抗毒。曾經指使深圳公安加監懲罰北上濫藥嘅燈膽權，噚日走入灣仔一間中學宣揚無毒校園，其間表現亢奮，疑似上任特首夫人董太上身，對住近千個學生高呼「抗毒！抗毒！抗毒！」好似要將積壓喺心頭多日嘅悶氣一洩如注。
無心情做壽晚宴甩底
又難怪燈膽權咁壓抑，慳電膽益親家單嘢曝光之後，佢連生日會都唔敢去，你話影響幾大？噚日八方講到，一大棚政商界猛人前晚喺馬會餐廳宴請燈膽權伉儷，原來係為65歲嘅佢賀壽，並由長年獲燈膽權照住嘅金管局新貴攞命陳，夥拍燈膽權知己鄭大班做搞手，原定6時入席，7點有得食，點知燈膽權最後一秒以心情欠佳為由，黯然爽約。
二五消息稱，呢壇原定七圍、縮剩五圍嘅壽宴，應約嘅VIP都要被揼心口位位三千，好多人去到先知煲呔唔嚟，惟有照食呢餐無主角、無主題嘅飯局。燈膽權瞓醒一覺之後，噚日朝去到聖公會鄧肇堅中學主持「同心結力抗毒大行動」，表現卻差啲嚇死八方。
不敢回憶，未能忘記。03年全城對抗沙士疫潮嘅歷史性一幕，當時嘅特首夫人董趙洪娉全副武裝化身鐵甲威龍，對住牛下邨民大嗌：「千祈！千祈！千祈！洗手！洗手！洗手！」正當大家慨嘆呢幕惹笑場面已成絕響之際，燈膽權明抄董太抗疫橋，用喺抗毒騷上面。
燈膽權致辭時講完一輪無毒校園訊息之後，失驚無神大嗌三聲「抗毒！抗毒！抗毒！」仲要全場學生陪佢叫埋一份。只見抗毒中嘅燈膽權目露燈光，右手出拳，振臂高呼，渾然忘我，將不可一不可再嘅堅毅精神發揮得淋漓盡致。不過可能極小撮家庭觀眾喺接收電視訊息嘅時候出現干擾現象，又或者個別電台聽眾幻聽，有網民報料話聽見燈膽權大叫三聲「港獨！港獨！港獨！」亦有人話聽到「抗共！抗共！抗共！」
成功將悲憤化為力量
作死咩！燈膽權家陣個膽仲細過納米燈膽，搞政制改革唔敢違抗中央半句，搞慳電膽被記者問多兩問就扮聾封嘴，搞生日會仲縮沙唔夠膽赴約，試問又點會夠膽嗌港獨或抗共？睇得出，燈膽權已經成功將悲憤轉化為力量。從佢喺大埔校園緊握拳頭一剎那起，燈膽權已經將自己打造成一個百毒不侵嘅無毒丈夫。就算網民改編多十幾廿首《電燈膽》，燈膽權都只會當係生日歌咁聽。
mailto:[email protected]