AmandaStrang之前揶揄前度男友郭富城又矮又花心，經常被拍到和她撐枱腳的日本前國腳中田英壽，近日被指連媾兩位日本女星，更為素食女星轉變飲食習慣。Amanda昨日聞吃菜敏感的壽仔吃素追女，為袒護好友，Amanda惟有重新界定城城也不屬於花心。
現年32歲的日本前國腳球星中田英壽，向來緋聞多多，昨日出版的日本雜誌《週刊現代》及《週刊POST》，分別指他近期搭上了日本女主播轉型女優的混血女星瀧川Christel及奀星長谷川理惠。
承認吃飯旅行
壽仔被指與同齡的瀧川Christel早在07年因工作而認識，但今年正式發展，有目擊者曾見過壽仔與瀧川一起撐枱腳，有電視台工作人員透露瀧川早前被電視台炒魷後，曾與壽仔一起到伊豆及日光等地方旅行，也有人爆料稱壽仔今年6月在東京參加足球友誼賽後，瀧川跟壽仔現身賽後派對。
同日出版的日本雜誌《週刊POST》，則以不起名的形式稱一名日本前球星正搭上日本奀星長谷川理惠，指揀飲擇食的壽仔，因認識了主張健康飲食的長谷川後，愛上吃蔬菜。兩個女星分別所屬的事務所承認壽仔有跟她們吃飯、旅行，但否認拍拖。
Amanda之前和壽仔在巴黎出雙入對，她昨日在中環出席Fendi錶展時，對壽仔在日本連媾兩女感驚訝說：「我哋係朋友，好普通啫，同其他女仔食飯，好common嘅事，佢都係一個男仔，我唔知佢有冇女朋友，你哋自己問番佢啦。」
對食素感驚訝
提到壽仔食素，Amanda就更驚訝說：「我唔sure，我冇見過佢食菜，佢對菜敏感，只係食肉，如果佢為個女仔改變，it'sreallysweet。」Amanda又不斷幫好友講好話，指食飯不代表約會。問到壽仔及城城那個較花心？她說：「兩個都唔花心，每個人都係想開心，唔可以怪佢哋。」
採訪、攝影：JessicaNgan