杜琪峯放棄為寰亞開拍賀歲片後，本月底決定執導一部黑色幽默電影，大膽起用已故好友梅艷芳的徒弟何韻詩做女主角。戲中阿詩飾演平凡的銀行文員，與飾演大賊的劉青雲和督察任賢齊發展出一段微妙關係。
杜琪峯繼《復仇》後，本月底將開拍一部時裝片《奪命金》，有說他是重拍83年他首部執導的電影《碧水寒山奪命金》，當年此片由鍾楚紅、劉松仁與江漢主演，《奪》片會由古裝改成時裝，由何韻詩、劉青雲與任賢齊主演。
夥小齊青雲
昨日記者致電杜琪峯求證，他說：「呢個月底開拍嘅新片《奪命金》係一部我全新創作嘅電影，絕對同我出道拍嘅第一部戲《碧水寒山奪命金》冇關。」今次起用何韻詩做女主角，阿杜承認是因為梅艷芳的淵源，他說：「佢係阿梅徒弟，所以我都想搵佢拍吓戲，我見佢演《游龍戲鳳》做得幾好，所以咪想搵佢合作拍番部戲。喺《奪命金》入面，佢會做一個普通嘅銀行文員，青雲就做賊，小齊係兵。呢部戲會玩一啲黑色幽默。」問阿杜為何放棄拍賀歲片？他說：「鄭秀文要開演唱會，我唔想佢分心，不如等出年先開拍，反而唔一定要拍賀歲片。」
身在台灣的何韻詩知道阿杜點名與她合作，她昨日在電話中開心地說：「以前已經睇過唔少阿杜嘅電影，佢係我好欣賞嘅導演之一，家可以同佢合作，梗係興奮，雖然我家喺台灣為舞台劇做緊綵排，但我一定會度期返香港演出呢部戲。」
無懼被責罵
問阿詩會否擔心在拍攝現場被阿杜罵？她笑說：「平時喺公司聚會都冇見杜Sir鬧人，我諗開工時佢都唔會亂鬧人嘅！」
採訪：葉雪
