請講出一隻可以冧掂大部份女生嘅顏色。粉紅！幾乎係指定答案。估唔到係連汽車用品都一樣係粉紅當道，證明咗Cuite系女人喺車廂內都影響力非凡。今日就來個粉紅汽車用品大檢閱，大堆頭建立一個車廂粉紅小王國，公主們，參考吓啦！
記者：許維雅
攝影：伍慶泉、譚盈傑
Model：CC
點睛位 粉紅毛毛$69/b
要搶眼夠氣氛，一定要有呢條粉紅毛毛，放喺車頭或車尾都可以強烈增強粉紅效果。
又香又艷
建立心目中粉紅王國嘅理想地點，除咗寫字枱、床鋪、房間，仲可以係部車！因為粉紅色嘅汽車飾品多的是，而且車廂空間細，要有震撼效果話咁易。當中花款最多嘅，要數除臭香薰，無論座枱式設計、插喺冷氣口嘅輕便裝，抑或掛喺倒後鏡嘅掛飾款，都花臣多多，美觀之餘又可以令架車香噴噴，所以香薰或除臭飾品絕對係建立粉紅王國嘅重要一步。
BONNETY毛毛香味掛飾$88/a
香味掛飾嘅味道選擇多不勝數，頭號熱選當然係薰衣草。
夠實際又識冧人
第二樣就係要考慮到個人需要，擺放一啲實際有用途嘅裝飾，當中以飲品架及電話架最受歡迎，有實際用途，選擇亦相當多。其次就有雜物桶、垃圾桶及防滑墊等，用嚟收納車內常見嘅雜物，都十分有用。除咗大路可愛毛毛款式，齋玩粉紅但就造型Elegant嘅配件都有排你揀。
LittleTwinsStar留言板$79/b
毛毛公仔造型已經好可愛，寫埋至冧留言貼喺玻璃，簡直係至掂撒手鐧。
純屬裝飾玩心思
最後，要內櫳有咁粉紅得咁粉紅，除咗一啲套套笠笠裝飾外，仲要花啲心機周圍黐周圍貼。大部份汽車專用貼都係心形為主，其次仲有啲得意圖案等你慢慢配襯，想再搶眼啲，咁就一定要下啲苦功黐閃石喇。
粉紅閃石貼$66/a
要夠潮，唔使講一定係玩閃石，貼喺邊，點貼法，都可以充滿創意，有排玩！
狂迷必睇
再瘋狂點，就要學呢架Mini嘅車主咁，連車身都變埋粉紅！再進一步，要逼埋小朋友做粉紅Fans！幫佢出番部粉紅座駕，呢架極可愛嘅電動玩具Mini，真係有「油門」可以揸得郁o架！
a/台日汽車用品公司（23924244）
b/AES汽車配件用品（23910370）
c/MiniPit（23641666）