上個月尾「坐正」合和（054）董事總經理嘅胡文新（Thomas），今晚自掏腰包捐錢義助香港青少年發展聯會嘅電影籌款，幫助協會喺鰂魚涌新成立嘅德育發展中心籌募經費。呢間中心以高小至初中生為服務對象，以透過歷奇訓練等互動活動，培養青少年嘅紀律同德育。
今次Thomas私人捐咗20萬銀，贊助電影首映禮場地同酒會等費用；至於電影首映禮當然係喺佢寶號旗下九龍灣國際展貿中心舉行，Thomas出錢出力做善事，又可以幫公司宣傳，醒目叻仔。
而套籌款電影叫《潘作良》，一聽就知係套政治正確嘅愛國電影，呢套戲由內地導演宋江波執導，故事根據真人真事改編，講述一名國家信訪部基層官員潘作良為民請命、為民伸寃嘅事迹。