呢排有兩個「波」玩謝唔少人，唔好心邪諗周秀娜或者變形亞姐。第一波係美國o靚仔福爾肯懷疑坐上嘅氦氣球，個波升上半空要警方同傳媒出動到直升機追蹤營救，結果原來係虛驚一場；另一波就搞到利物浦輸畀新特蘭，錄得今季第4場英超敗仗。
連拿撲自己友沙灘波
上周六利物浦作客新特蘭場英超，開賽唔夠5分鐘就出現極滑稽場面。新特蘭前鋒戴倫賓特禁區邊施射地波，紅軍後衞格連莊臣出腳攔截時稍為改變方向，順勢踢埋身旁一個唔應該喺球場出現嘅紅色沙灘波；突然有兩個波出現，搞到紅軍門將連拿心亂如麻，或者佢心繫紅軍，結果望住個紅波，畀個真正比賽用嘅足球溜入網。
紅軍即時向球證同旁證投訴，但球證一於少理，判入球有效；結果就憑呢個入球，新特蘭贏利物浦1:0，不單令紅軍3連敗，亦已經喺聯賽輸到第4場。英國電視台效率好高，半場未夠就搵到個涉嫌將沙灘波拋出場嘅o靚仔，但佢當時身在紅軍球迷區，加上個沙灘波印有利物浦標誌，相信佢係「紅迷」；利物浦「死喺」自己友手上，真係冇得好怨。
連一向唔認輸嘅紅軍領隊賓尼迪斯，賽後都一反常態：「就算冇沙灘波出現，個波都相信會入；今場我哋打得好差，之後有機會亦冇好好把握。」但前英超球證雲達就話，其實呢個入球唔應該成立，因為球場內有其他異物，球證應即時吹停比賽。
紅軍冠軍賠率冷至12倍
我求大俠睇足全場，冇謝拉特同費蘭度托利斯，紅軍猶如冇牙老虎；如果唔係戴倫賓特同馬白蘭基敗家，利記點止輸一球？計埋費倫天拿同車路士，利記已連輸3場；好彩同日車路士輸畀維拉1:2，曼聯贏保頓2:1，令紅軍只係落後榜首曼聯7分。冠軍賠率冷到12倍嘅紅軍，下周日就主場對曼聯，呢啲6分波要把握，希望到時有其他波出現，幫一幫紅軍啦！