噚日關楚耀（Kelvin）被踢爆飛甩衞詩、搭上前黑澀會美眉王義廷（Mika），早排Kelvin去咗台灣做人肉速遞冧女，Mika仲事先張揚月底來港「回禮」，寃氣到痹。
查實今次戀情曝光，皆因Mika將佢同Kelvin嘅親密合照放上blog，寫埋啲肉麻嘢，仲叫男友做HKbb。報道一出，Mika只係將條題刪咗bb兩個字，其餘乜都冇改。
咁高調，Kelvin未必鍾意，如果佢見埋女友啲舊相可能仲㷫，事關Mika將佢同紋身舊愛嘅親熱照擺晒喺同一個blog，除咗攬攬錫錫，仲有大量床照，好多都激到爆，有啲仲係鴛鴦浴，有啲係Mika只戴黑bra同男友擁吻，就連胸壓錫錫都有，睇到馮仁昭眼凸凸。
舊男友愛戴Bra
最難以理解嘅係所有相都係Mika自拍，仲要公諸同好，夠晒離奇，但正所謂物以類聚，呢位紋身男友都係極品，有鋪易服癮，仲戴bra手舞足蹈影相，相當驚嚇。噚日Kelvin個老友陳柏宇去維園出席活動，講到Kelvin有新歡，佢話：「如果拍拖就恭喜佢，我都會向佢求證吓先。」講到Mika好張揚，陳柏宇話：「唔會畀意見，假設真係拍拖，點樣先開心佢哋識得選擇，最重要唔好影響事業。」
