可口可樂娶滙源果汁（1886）不果，化悲憤為力量，直接投資的非碳酸飲料武漢廠房正式投產，涉資6億元人民幣（下同），係公司內地投資額最大的飲品廠，亦係大中華區第39間廠房，年產量達4500萬箱。
所謂非碳酸飲料，即係冇氣飲品好似果汁、茶、酸奶等。可口可樂03年才進軍此市場，短短幾年間「美汁源」品牌果粒橙，已取代統一的「鮮橙多」成為市場一哥。最近再下一城，宣佈推出美汁源品牌的果粒奶優（乳酪），進軍乳飲料市場，能否複製美汁源的成功方程式，睇過至知。
由於碳酸飲料市場近飽和，可樂去年打算收購滙源鞏固果汁市場的壟斷地位。據統計，中國人均果汁消費每年約1公升，遠低於發達國家的40公升，證明當時以超高溢價收購滙源並唔係「儍仔」。
食品股選擇多
不過中國人飲廣東凉茶多過可樂，去年全國產銷超過600萬噸，凉茶市場本來係「藍海」，可口可樂都吼準商機，於05年收購「茶研工坊」，但慘淡經營兩年多後斬纜止蝕；百事可樂則以「草本樂」品牌高調進軍凉茶市場。兩巨頭雖財雄勢大，但始終打唔低連續兩年獲頒「消費者滿意度第一」飲料——王老吉呢個市佔率60%嘅老字號。
另一個新藍海係乳品市場。08年內地水果牛奶飲品銷量62億公升，暫時仍係娃哈哈及旺旺（151）天下。目前康師傅（322）在茶類市場佔51%絕對領導地位，瓶裝水亦以23%稱霸；果汁就輸番，唔夠15%。
康師傅早前透露，會視可樂為主要競爭對手，以目前飲料規模約佔可口可樂的六成幾，公司將會分拆低濃度果汁業務單獨營運，希望同可樂爭一日之長短。不過康師傅唔止叫一飛，王牌產品即食麪上半年經營溢利大增80%，毛利雖唔及飲品咁高，但勝在市佔率全國最高，唔係一時三刻可被取代。
上市的食品股眾多，近期充滿動力的除咗康師傅，仲有中國糧油（606）同雨潤食品（1068），係趁回吐吸納之選。炒落後仲有滙源，4.8元支持位排吓隊冇壞。
胡孟青