鬍鬚曾通完波仔之後人氣急升，力逼競逐特首寶座嘅最大勁敵唐唐。佢噚日喺網誌度話，入院期間好多朋友同市民送上慰問卡，所以佢特別整咗張網上感謝卡，向所有粉絲講thankyou；而做咗感謝卡主角嘅，係佢屋企最為食嘅成員Oliver。Oliver係隻柴犬，舊年鬍鬚曾送畀囡囡做聖誕禮物，家陣已經14個月大，最鍾意同鬍鬚曾玩追網球。
愛心形象加分
唔講唔知，鬍鬚曾係愛狗之人，佢住喺美國波士頓時，就養咗兩隻鬆獅狗，狗仔叫Cheshire，狗女叫Cherry。鬍鬚曾話，Cheshire當年係小霸王，早晚帶佢出去散步，都未遇過其他狗狗嘅挑戰，同體形較細、溫和膽小嘅Cherry相映成趣。最搞鬼係兩隻嘢勁多毛，鬍鬚曾每日為兩隻狗仔梳毛，都會將甩出嚟嘅毛收集送畀朋友用嚟織冷衣。
西方政要養貓拖狗可以建立有愛心嘅形象，有助提升民望。你睇奧巴馬早前收養第一狗傳媒幾咁關注；當年貝理雅老婆被傳唔妥唐寧街10號隻貓，都要特登出嚟澄清；末代港督肥彭隻梳打同威士忌，更加成為港人殖民地記憶嘅一部份。睇嚟唐唐同振英都要考慮養番啲動物，只要唔係錦鯉就得。