新股衝完一輪，本周將是另外一輪招股熱潮，多隻新股都屬內房股，當中邊隻係寶，邊隻是草，唔容易分辨。就以早前一隻大幅減價4成招股的寶龍地產（1238）為例，縱是大幅減價，首日掛牌仍是高開低收，上周五更要跌穿招股價，任何價位入場者都要蝕。
寶龍以發展商業物業為主，號稱擁有超過300萬平方米的土地儲備，但集中在二三線城市，以8倍PE招股表面便宜，實際未必合乎機構投資者口胃。稍花時間睇招股書，發現公司已完工商場項目僅4個，建築面積23萬平米可供租賃，就算呎租貴過國金，預測09年淨利潤都無可能去到十幾億銀，原來絕大部份預測及往績盈利是來自開發中物業預測公允值收益，不涉現金流入，所謂低PE，要過濾再過濾。假如無時間睇招股書，千祈唔好亂咁落叠。
炒冷門內房股吼川河
吼冷門內房股，湯臣集團（258）上周五出現異動，股價升近9％。該公司以現金足，NAV折讓大以及所持物業超高價而聞名，但也惹來不少市場疑問，令股價長期跑輸同業，現在股價忽然轉強，或反映投資者風險胃納增加。湯臣中期純利激增1倍多，母公司川河集團（281）純利更大增3倍，而川河持淨現金6億元，可供出售證券投資5.6億元，以上流動資產已高過公司市值8.6億元，還未計所持湯臣市值，相比之下川河升值潛力也不低。湯臣上周五收3.90元，升8.9％；川河收0.33元，升10％。
歐陽風