煲呔向全港市民推銷慳電膽明益親家呢單嘢，連日來搞到煲呔一身蟻，雖然政府高層空群出動幫老闆解畫，死撐冇涉及利益衝突，但係件事疑點重重，仲越嚟越多團體出嚟爆料指證煲呔，暫時都唔知點收科。唔知係咪因為呢單嘢搞到心情唔靚，煲呔噚晚臨時缺席咗馬會一個大型宴會。有人講呢個FUNCTION係煲呔嘅65歲壽宴，又有人話係佢同老婆結婚周年紀念。
政商界猛人玩得好開心
噚日八方收到料，話有人會喺馬會宴請煲呔兩公婆，連佢親家莫錦泉都會出席賀一賀佢。馬會班員工早兩日收到通知，知道煲呔將會大駕光臨，自然不敢怠慢，做好準備，搞番一餐中西合璧嘅FUSION菜畀煲呔兩公婆慢慢嘆。
不過，唔知係咪慳電膽事件爆出嚟嘅關係，二五仔話宴會規模突然縮細咗，由原本擺七圍變成五圍。
八方幾個同事噚晚去馬會採訪，結果真係有收穫，散席時大班政商界猛人離開宴會廳，政府高層就有唐唐、大病初癒嘅鬍鬚曾同李少光、啱啱離開官場嘅有馬時亨、「橋王」許仕仁、仲有大班鄭經翰、梁智鴻、梁劉柔芬兩公婆、李國寶父子。大家睇嚟玩得好開心，個個飲到面紅耳熱，臨走仲見到大班攞住幾支靚紅酒帶番屋企。
不過，等咗成晚，獨獨唔見煲呔兩公婆出現。特首辦話煲呔噚晚冇喺跑馬地出現，更一口否認宴會同煲呔親家莫錦泉有關。至於宴會為乜而搞，特首辦就無嘢講。八方唔知最後餐飯邊個埋單，但單睇出席人士食到咁開心，呢張單都一定唔嘢少。不過，如果親家噚晚都有出席宴會，咁煲呔避開都係好事，貴事俾人影到相，攞嚟大造文章就唔好啦。生日同結婚周年紀念年年都有，最多出年搞番大囉。
mailto:[email protected]