「光纖之父」高錕獲頒諾貝爾獎，全城慶賀，噚日終於輪到民政事務局局長曾德成出嚟抽水。佢以〈笑眯眯的高錕〉為題，喺佢網上專欄《局長隨筆》度宣佈，香港郵政將會發行一張以高錕獲得諾貝爾獎為題材嘅郵票小型張，仲會為此舉行公開比賽，徵求設計，叫市民踴躍參加。
乜紫荊都冇夠諷刺
政府出郵票誌念高錕嘅成就同佢與香港嘅因緣，錦上添花本來無可厚非，但難頂嘅係，德成局長乘機抒發自己嘅「情懷」，喺篇隨筆度話，近日傳媒報道好多關於高錕平易近人嘅小故事，例如被學生搶咪、搶白之後仍然笑眯眯；出席名人盛宴之後施施然坐電車離去等等，令佢覺得「在這個對追逐名利習以為常，對『博出位』不以為怪的社會中，能一心想着造福世界而又真能造福世界，同時又可以整日笑眯眯面對光怪陸離世情的，真是高人。」
八方都覺得高錕係高人，但當年佢並非認為學生示威搶咪甚至搶白係博出位或者光怪陸離，佢笑眯眯應對，係因為佢包容同尊重學生嘅表達自由，更明白大學校園係培養學生批判、獨立思考嘅地方。
不過，德成局長唔曉呢啲道理一啲都唔出奇，否則點會爆出佢要社福界扮河蟹嘅醜聞，點會因為個社工協助大澳居民爭取改善環境，佢就話大澳唔和諧，搞到人哋要調職吖。
根據德成局長嘅標準，當年啲學生向校長抗議，搞到大學校園咁唔和諧，可能都應該踢出校。至於嗰啲名人盛宴幾咁光怪陸離同充斥住博出位，八方就唔夠成日出席呢啲場合嘅德成局長熟識喇。
為高錕出郵票，八方都好贊成，總算係特區政府後知後覺遲來的補鑊。事實上，自諾貝爾獎結果公佈之後，唔少網民留言，話回歸以來，特區政府年年授勳，一啲唔覺佢對香港有乜貢獻嘅人都攞咗大紫荊，反而做過中大校長、為香港科研出過力嘅高錕就乜紫荊都冇，好諷刺。
政府冇乜嘢賀高錕
德成局長噚日話，高錕曾經喺我哋呢個城市讀書、教書、出掌大學、做研究、過退休生活，同市民一齊逼地鐵、行超市，係我哋嘅一分子。但講到除咗出郵票之外，香港政府仲有乜嘢賀高錕，就話大家可以喺公共圖書館重溫高錕以前喺中央圖書館演講嘅錄影，以及香港科學館會舉辦有關高錕與光纖科技嘅專題展覽。就係咁多。