曾特首施政報告講及「保育中環」，從理念上嚟講，比較新鮮，以前從未聽任何一位港督或特區行政長官講過。約一個月前，置地公司在交易廣場搞一個百年中環發展圖片展，左丁山趁午飯時間，仔細欣賞各圖片近一小時，發覺一九三○年代嘅中環海旁最有古典美，假若當年政府有遠見，提出保育中環嘅話──不准填海，不准拆建由遮打花園至畢打街嘅大廈──完全保留嘅話，今天中環核心地段必然成為世界名勝。
可惜吖，已經拆晒了──除咗立法會大樓之外──二十世紀三十年代嘅圖片，只堪憑弔。今日講中環保育，已經遲之又遲，嗰日在中國會十五樓吃午飯，從窗口望出舊天星碼頭，發覺面目全非，可嘆也，好彩現在已經唔可以再在維港填海，否則維港變維河，豈止破壞香港風水，簡直扼殺天然良港也。
保育還保育，還要兼顧商業大廈供應量，中環中級商廈供應量唔夠，經濟復甦之後，外資銀行/基金一旦再擴充，租金勢必上升，而即使上升，IFC之類係得咁多樓面，點有額外樓面出租呀。中環街市地盤夠大，本可發展為甲級商廈，亦可趁在重建之時，騰空地面以及最低兩三層作為公共花園/休閒地方，提供適量公共空間，可謂兩全其美。家將中環街市交畀市建局「活化」喎，為之考起，點活化呀？睇吓上環嘅「西港城」，市建局「活化」多年，有乜成績做出嚟呢？西港城外觀靚過中環街市，十年來不見有何活力，市建局實在無辦法給人信心。一位外籍資深建築師曾經對左丁山講過，包浩斯風格建築物的確有其歷史價值，但唔係講一聲包浩斯就可以將蛤蟆變天鵝，佢認為中環街市就係一件包浩斯風格嘅差劣習作，不值得保留。可能佢人微言輕，冇人聽佢意見，家話要保留中環街市咯，特首一錘定音，請各方才子才女為活化中環街市度橋啦，既然市建局重建嘉咸街，不如就索性將嘉咸街啲攤檔及舊舖全部搬入去中環街市，還原本來風貌，包保日日有人流，夠晒活。