理工大學前校長潘宗光篤信佛學，退休後更多時間潛心學佛，雖然塵緣未了，未能遁入空門，不過佢學佛熱情好強烈，早前去咗北戴河，同10幾個同道中人閉關共修，日日打坐冥想，餐餐茹素，其間更加斷食四、五日，結果輕咗逾10磅，激瘦而回。
要盡量降低慾念
潘宗光話減低食量以至斷食，係要盡量降低慾念，全程靠意志支持捱餓，雖然唔容易，不過佢話好值得，因為過去幾十年營營役役，應酬無日無之，終於有機會畀腸胃休息吓，感覺十分好。理大噚日頒榮譽博士畀潘宗光，表揚佢對學校貢獻。退休後除咗學佛，潘宗光仍做好多俗務，分別應呂志和同胡應湘邀請做上市公司非執董，佢話由於兩個富商都捐過錢畀理大，人哋開到口，唔好意思托手踭。