無綫台慶劇《宮心計》和《富貴門》明晚連環出擊，8時30分首播的《宮心計》由佘詩曼和楊怡孭飛，大玩後宮佳麗鬥爭橋段，首演奸妃的楊怡大有機會奸出位，跟《巾幗梟雄》的四奶奶鄧萃雯爭視后。接着9時30分播映的《富貴門》，除有呂良偉和戚美珍強勢回歸外，焦點還落在奸仔羅嘉良身上，飾演老千的他壞事做盡，連哎吔細妹袁詠儀也要強姦。兩部台慶劇鹿死誰手雖是未知數，但楊怡、羅嘉良兩大奸角，料必奸出位。
撰文：林妃、何慧斯
羅嘉良強姦袁詠儀
繼96年無綫劇《天地男兒》後，羅嘉良在新劇《富貴門》再演奸角，飾演老千沙富來，混入銀行家族冒認二少爺卓一鳴，更強姦女主角袁詠儀。
「進入瘋狂狀態」
雖然今次再演反派，但嘉良揚言跟當年《天》劇演繹方式完全不一樣，他說：「自己真係好多年冇演反派，今次再做，我喺心態上會做得更仔細。事隔13年，我相信自己各方面都變得更加成熟，樣樣拿揑得更好，就正如酒嘅年份越耐就越醇越靚一樣。」對於自己在《富》劇的表現，嘉良表示滿意，尤其是有幾場跟呂良偉和袁詠儀的對手戲最堪回味，他說：「有場戲講我綁架戚美珍嚟威脅呂良偉，嗰場戲我已經進入一個瘋狂狀態；另一場係講我喺浴缸放水，要浸死自己心愛嘅女人袁詠儀，呢兩場戲嘅效果我都幾滿意。當然，一部劇嘅成功係講求整體合作，監製、導演同編劇都擺咗好多心機落去，成班演員亦好夾，大家合作得好開心。在我嚟講，最難得係有機會同呂良偉合作，佢係我前輩中嘅前輩，當年我入TVB冇幾耐，阿呂就離開TVB，大家未有機會碰過頭，今次都係第一次。」
「勝在配搭新鮮」
問嘉良可擔心觀眾將《富貴門》與《宮心計》比較？他說：「兩部劇種唔同，好難比較，雖然女人爭寵嘅戲觀眾一般都好受落，但我哋呢部勝在配搭夠新鮮。」
監製莊偉健：探討人性
《富貴門》監製莊偉健指今次新劇不但是大家族兄弟鬥爭，而且是善與惡的一場爭鬥，莊偉健說：「人究竟係性本善定性本惡？羅嘉良本來係個本性善良嘅小老千，佢初初冒住生命危險去救唔認識嘅袁詠儀，證明佢心地都係好好，但人始終有貪念，嘉良作為老千，只可以喺錢同女人二選其一，雖然最後佢決定要錢，但自己又忘記唔到嗰個女人，既然得唔到就強姦佢。
「至於身為家中長子嘅呂良偉，搞婚外情搞出個大頭佛！部劇係想帶出一個訊息畀大家，就係唔好攞唔屬於自己嘅嘢，適當時候要識得收手。」
談到《富》劇賣點，莊偉健說：「部劇sell卡士、老戲骨。呂良偉同戚美珍離開TVB成20年，今次返嚟拍劇對觀眾有一定新鮮感，再加上羅嘉良、袁詠儀、郭可盈、馬德鐘成班好戲之人，真係演技大鬥法。」
亂倫爭產踩界
莊偉健續說：「嘉良同袁詠儀嗰條感情線其實幾踩界，因為嘉良冒充做卓家老二之後，袁詠儀個身份就變咗係佢妹妹，除非嘉良甘願放棄家產回復自己嘅老千身份，否則佢一日冒充落去，一日都唔可能同自己妹妹談戀愛；有場戲就係講嘉良接受唔到袁詠儀嫁畀馬德鐘，於是強姦咗袁詠儀。另一場係呂良偉發現嘉良原來冒充佢同父異母細佬之後，兩個人攤牌鬥足9分鐘，相當精采。」
劇情簡介
老千豪門成魔之路
41集時裝劇《富貴門》，講述老千沙富來（羅嘉良飾）冒充已故銀行家卓崇禧私生子卓一鳴的身份混入卓家，搖身一變成為豪門二少。卓家長子卓一元（呂良偉飾）視一鳴為親弟，事事包容。
原本一鳴打算騙卓家一筆錢便抽身而退，料不到他在卓家得到的感情和利益，使他越來越不能自拔。事緣一鳴未冒認做卓家二少前，邂逅了卓家三小姐一心（袁詠儀飾），後來他冒充成為一鳴後，欲斬斷這段假不倫之戀，但偏偏一鳴無法忘懷一心，從此陷入痛苦的畸戀中。
另一方面，一鳴在卓家面對金錢和權力的巨大誘惑，欲罷不能，最終為掠奪卓家一切、得到一心，由老千變成魔鬼，施計強姦一心。最後一元以人性的善良令一鳴放下屠刀，但一鳴無法面對良心譴責而選擇自毀之路。
首播日期：明晚9時30分
楊怡痛罵佘詩曼
入行10年的楊怡在《宮心計》中首次演反派，跟佘詩曼、關菊英、米雪和惠英紅等展開連場後宮鬥爭之餘，更大有機會跟鄧萃雯力爭視后寶座，劇集還未出街，楊怡已攞盡頭彩。今次能夠扮演大奸角姚金鈴，楊怡坦言是自己主動爭取，日前她接受訪問時說：「仲未接劇本時，我已經開晒口同所有人講，期望自己戲路方面有啲轉變，因為自己都做咗10年，無論好與壞都係時候轉變一下，所以接演呢個角色嘅時候我已經有晒心理準備。」
「拗到面紅耳熱」
劇中楊怡跟一大班女人輪流鬥法，芸芸對手中，楊怡表示跟阿佘最有火花，她說：「同阿佘對手戲最多，有好多場戲大家都拗到面紅耳熱，感覺好正。」今次雖說是阿佘和楊怡擔正做女主角，但外界似乎一面倒將焦點放在楊怡身上，她可會感到壓力？她說：「咁又冇喎！因為部劇仲有其他人一齊做，個個都做得好好。」
盼收視勝《富貴門》
談到在《宮》劇的表現，楊怡謙說中規中矩，若然100分滿分的話，她會給自己60、70分。問她可有信心憑今次大奸角摘取視后寶座？她說：「自己當然恨攞獎啦，但會平常心面對。」
《宮心計》與《富貴門》同日播映，難免會被比較，楊怡說：「呢樣嘢在所難免，邊套贏都好，一定有收視，當然我希望自己有份做嗰套高啲啦。」
監製梅小青：借古諷今
貴為劇集《宮心計》的靈魂人物，監製梅小青笑稱今次感覺特別開心，現階段此劇算是她最滿意的代表作，每個部門都付出好大努力去做，希望觀眾欣賞故事之餘，也欣賞他們的誠意。
「奸到眼珠凸出」
談到《宮心計》的緣起，梅小青說：「呢部劇本來叫《劉三好》，有一次我去咗佛堂參加儀式，見到啲善信以『做好事、說好話、存好心』去寫咗啲文章，睇完之後我覺得呢個主題真係好好，跟住就諗不如放喺個劇本上，最後決定以唐朝盛世做背景，將『三好』放喺宮中爾虞我詐嘅生活，睇吓可唔可以生存，我哋就捉住咗呢個重心，繼而引伸成部劇，我哋想話畀人知機關算盡，總會有算錯嘅時候，只有心存『三好』，先可以永恒。雖然呢部係古裝劇，但係會感受到現代社會政治、辦公室政治，可能有似曾相識嘅感覺。」
對於楊怡飾演的奸角，梅小青與楊怡早已說得清楚，她說：「事前我同楊怡講，肯奸到盡先可以做，如果唔係留番下次先合作，我怕有啲為咗保護自己而就住去做，咁就冇咗呢個效果，所以我寧願講到明。楊怡聽完之後話冇問題，每次演出後都問番個表現，佢仲話自己奸到連眼珠都凸咗出嚟。」問楊怡的角色最終結局是怎樣？梅小青大賣關子說：「唔講得，要慢慢睇落去，我只可以話有時死唔係最慘，有啲嘢係比死仲慘。」
劇情簡介
婢女封后鏟除異己
33集的《宮心計》以唐朝為背景，講述憲宗駕崩後，郭貴妃即後來的郭太后（謝雪心飾）擁立其子李宥為皇帝，是為穆宗。
劉三好（佘詩曼飾）父親因支持憲宗二子李揮為皇帝，被穆宗秋後算賬，一生從軍塞外，而三好母親、三好及家中小婢女姚金鈴（楊怡飾）被迫入宮為奴。
三好一直緊守亡母采瓊「做好事、說好話、存好心」的遺訓，但好姊妹金鈴卻利慾薰心，為求成妃不擇手段，最後在穆宗十三弟李怡（陳豪飾）被擁為帝後，如願以償被封麗妃，並用盡手段對付與她為敵的人，包括昔日她跟隨的尚宮阮翠雲（關菊英飾）和另一尚宮鍾雪霞（米雪飾），金鈴甚至連三好被封華妃，自己封后也不滿足，誣衊皇上的近身侍衞高顯揚（鄭嘉穎飾）與三好有姦情，誓要鏟除她。
首播日期：明晚8時30分
