煲呔推行綠色新政，硬銷燈膽券逼市民換慳電膽，被踢爆原來佢親家係「慳電膽大王」，如何化解呢埸政治危機，甚考特首辦主任譚志源功力。
禮賓府夾過八字
政壇中人笑言，譚志源做阿松新聞秘書時，發生偷步買車醜聞，最終阿松辭職下台，估唔到譚志源入禮賓府冇耐，又爆出呢單利益輸送風波，唔知係佢腳頭唔好定時運低。譚志源上任時，表示買車事件令佢經一事長一智，獲益良多，估唔到咁快佢就有機會學以致用。
政界傳言煲呔物色新的特首辦主任接替陳德霖時，禮賓府話得事嘅人要睇過有關人等時辰八字，唔夾嘅話，唔該過主，因此遲遲都未搵到人上工，八方唔知譚志源時辰八字，如果真係夾到啱先返工，咁肯定有人算漏咗，如果要補鑊，禮賓府風水局唔知使唔使大改，龍師傅真係要幫吓手嘞。
不過有官員笑言，譚志源好命就真，幾年間由普通政務官升呢做到特首辦主任，官階人工幾級跳，越大鑊越快樂，經過今次慳電膽風波，下一站做司局長都唔係冇可能。