隔牆有耳:煲呔任總紫荊泯恩仇 - 李八方

隔牆有耳:煲呔任總紫荊泯恩仇 - 李八方

慳電膽醜聞纏身嘅煲呔,噚日喺禮賓府主持授勳儀式,在場官員一律封嘴,無人敢談慳電膽事件。今年授勳名單早已公佈,拯救四川地震災民嘅消防員實至名歸無人異議,政務司司長唐英年獲頒最高榮譽大紫荊勳章卻備受爭議,但既然奧巴馬都可以攞和平獎,畀個大紫荊唐公子,當豪畀佢囉。

任志剛去完日本度假,噚日同太太一齊去攞大紫荊。
李家皓攝

煲呔面貼面同任太打招呼。

煲呔任太貼面打招呼

退休後話要學吓點樣hea嘅任志剛同獲大紫荊勳章,「任總」去完日本旅行,噚日闔家到場。退一步海闊天空,任總瀟灑走一回,同煲呔泯恩仇握晒手好friend咁,煲呔更同任太面貼面打招呼。
多個高官都獲嘉獎,政制及內地事務局局長林瑞麟都有份,太太同大女捧場,林家女兒悉心打扮,突出身材引來唔少目光。白鴿黨李華明守得雲開獲銀紫荊,林瑞麟拉埋佢合照。肥仔明冇飄飄然,指特區政府親疏有別唔啱,民主派其實對社會貢獻良多。
獲金紫荊星章嘅前任商務及經濟發展局局長馬時亨話有幸服務市民,係畢生榮譽,希望香港明天會更好;同樣獲金紫荊嘅食物及衞生局局長周一嶽稱榮譽歸於所有同事。
40幾個去年到四川參加地震救災工作嘅消防員、救護員,獲行政長官公共服務獎狀,前任特首辦主任林煥光、衞生防護中心總監曾浩輝、醫管局質素及安全總監梁栢賢、衞生署副署長譚麗芬同港大感染及傳染病中心總監何栢良等人,就獲行政長官社區服務獎狀。
獲公共服務獎狀嘅高級消防區長譚棣強話,能夠參與四川救災工作係消防生涯中一個非常難得又寶貴嘅經驗;消防總隊目許培道對於獲表揚心情矛盾,因為冇地震,佢哋根本就唔會攞獎,天災人禍後得此殊榮,不知是喜是悲。
「玩具大王」蔡志明噚日亦獲頒金紫荊星章,全家上下都有撐場,親家馬介璋亦獲得銀紫荊星章,雙喜臨門。蔡志明謙稱今次係沙田第一金,「我係第一個沙田友獲授勳,同親家一齊攞好有意思,會一家人食飯慶祝。」玩具大王多年來共捐出逾億元善款,呢個勳章含「金」量十足o架!

mailto:[email protected]

林瑞麟大女(右)亭亭玉立,引來唔少注視。

蔡志明(右二)由太太牽着,與大女加敏、兒子加讚一齊出席授勳儀式。