麥當勞叔叔陪伴好多人成長，暱稱老麥幾乎冇咗佢唔得，環保觸覺卻指老麥唔環保，食物又唔健康，總之就害得人多，噚日發起罷食老麥行動，搵埋多個立法會議員簽署唔食老麥約章，今年內唔再幫襯呢間餐廳。
環保觸覺話簽署約章議員包括李卓人、余若薇、陳淑莊、王國興、李永達及張國柱，阿人指老麥成日剝削工人，唔幫襯佢好合理，況且快餐食物高脂高糖，唔多啱佢食嘅，呢兩個月唔食冇大問題。
麥當勞發表聲明，表示會加強在環保教育方面工作，又指一直奉行「3R」政策：多減量、多再用、多再造，盡可能使用可再用物料，07年同環保觸覺合作辦「無飲管日」，向顧客宣揚環保的訊息。