曾特首發表施政報告，講咗唔夠十分鐘就見社民連三子發難，企起身舉牌，隨即俾立法會主席趕出場。中午在中國會碰到黃毓民，於是笑佢：「乜咁早起身呀，想早啲放工，費事聽到瞌眼瞓呀？」毓民話唔係，原先夾定泛民中人，一齊起身嘅，點知佢地三兄弟一郁手，其他人仍然坐響度，變成豬仔俾人出賣。政治就是這樣的，人人做騷，各有盤算，未到最後一分鐘，都未知道預謀有何結果呀。
毓民話暑期到北美努力為珠海書院及社民連籌款，叫做有啲成績，珠海書院並已得到政府在屯門撥地三公頃以上，興建新校，預期在二○一二年落成，將升格成為大學，政府提供十年貸款，但仍然需要籌集兩億幾三億資金先至掂，毓民話希望珠海歷年校友踴躍捐款，亦希望各界人士捐錢贊助。
毓民舉牌被趕，純為爭取普選。雙普選已有時間表（二○一七及二○二○），尚無路線圖，將來有排搞。但在實際做事層面，毓民就支持曾特首噃，起碼在發展教育產業呢方面，珠海書院劍及履及，有所行動先吖。這年頭大學籌款，並不容易，最弊今年政府十分孤寒，唔肯撥出十億元作配對捐款之用（MatchingGrant），令到私人捐款意慾提不起來。特首在施政報告裏面講，自去年至今，政府推出的紓困措施達八百七十六億港元，相當於本地GDP之5.2%。派糖數目如此巨大，為何吝嗇區區十億元呢，高等教育界人士想極都唔明白，政府口口聲聲話發展六大優勢產業，以教育產業為先，施政報告卻只有短短五段（第26至30段），對增加大學教育撥款及擴大大學收生數目，未有提及，令人費解。
左丁山與毓民都唔係中國會會員，到此吃飯，梗係有人請客啦。午飯單尾係咖喱米粉，自己唔食辣，敬謝不敏。主人家Ｃ醫生話：「一項研究顯示，印度人口咁多，老人患上癡呆症嘅比例偏低，原因可能係印度人多吃咖喱，你以後要學吓食咖喱呀！」唔駛睇印度人吖，睇吓飯煲大王蒙博士，八十幾歲咯，頭腦幾精靈呀，佢同時又係蒙氏咖喱發明人噃，凡係食過蒙家咖喱嘅，無不叫好！