聽唔慣HeavyMetal，感覺真係幾辛苦！點解Blu-ray遲過DVD咁耐先出街，無從稽考，如果你係《爆粗Band友》漫畫迷，而且仲流緊重金屬嘅血，呢隻藍光一定要買嚟收藏；不過，奉勸各位，拆自己間屋唔緊要，唔好半夜三更開出嚟睇，驚你俾人投訴咋！
記者：陳國輝
攝影：林栢鈞
《爆》片必睇7.1靚聲位
K.O.大戰嘈到爆
內容無謂多講，睇過漫畫、入過戲院，買過DVD睇嘅朋友，肯定唔少！特別一提，今次Blu-ray版喺音效方面作出重大提升，比起之前隻DVD版，新加入PCM同埋DTS-HD兩種7.1效果，其中必試位筆者就揀咗中段松山研一與敵人嘅K.O.大戰。呢一幕最爆係出盡Sub-Woofer力水，而且係突然大聲嗰隻，有幾勁，難以形容，但記得筆者於晚上播放時，就搞到玻璃窗都震到出聲，唔再扭細聲啲，隨時俾人投訴o架！當然，尾段同美國金屬狂人決一死戰呢幕，亦屬必睇拆屋位。講番轉頭，話明7.1，梗係要試真個立體感啦！Sorry，《爆》片本身唔係「試機天碟」材料，拆屋當然冇問題，但要將前後左右聲軌逐一分辨，佢真係做唔到。
暗細位表現麻麻
行埋1080p全高清畫質，松山研一會唔會再靚仔啲？答案其實係唔覺。《爆》片入面特別注重演唱會嘅感覺，例如觀眾席上嘅燈光，激光效果等，之但係筆者睇咗DVD，再睇埋Blu-ray，雖則話1080p輸出，但分別唔算好大；重點改善嘅係人物容貌以及日間環境，相對DVD版明顯細膩啲，但暗位表現仍然較差，有輕微起渣情況。至於Bonus方面，Blu-ray版並無加入新元素，淨係得條Trailer畀觀眾欣賞，連製作花絮、演員訪問環節都冇，真係有啲失望。
專家意見
聽DTS-HD最好：
影音專家Ricky抵死咁話，作為漫畫迷，當然要支持到底，之但係畫質表現只係不過不失；Audio方面，佢提議大家不妨揀日語DTS-HD聲軌嚟睇，皆因佢比PCM7.1聲壓還要大；至於廣東話版因支援Dolby2.0，效果實預咗冇咁好。
佢話尾段發生爆炸一剎那，音響表現較突出。
格式：Blu-ray
畫面：1080p
音效：PCM7.1/DTS-HD7.1/Dolby6.1/Dolby2.0
語言：中、日