上月燈神
剛過去一周嘅時間全奉獻畀屋企人，上周六去咗探大老表個啱啱出世嘅仔，BB仔真係好得意，肚餓、瀨咗屎就喊，食完奶奶同換完片就即刻收聲。今次係我第2次做表叔，呢位表姪仔除咗個頭大過其他B外，手手腳腳都特別長，似足有成6呎高嘅老竇，個鼻就似媽咪。
轉頭周二放假，先單拖去咗深水埗睇figure，結果買咗IQ博士入面嗰隻好廢嘅超人，同埋死亡筆記隻Q版L做家中新擺設，使費一啲都唔貴。下次決定買埋隻變咗大猩猩嘅悟空，咁先會暫時收手。行完街睇埋iphone嘅新計劃，再買埋對做伴郎時有用嘅全白一剔波鞋，之後約咗最愛嘅媽子請佢鋸靚扒。嚟到銅鑼灣呢間幫襯咗廿幾年嘅餐廳，個全餐內容竟然同幾歲嚟嗰時一模一樣，畢傑一向夠專一，廿幾年都係食同一款嘢。
講番貼士，《畢賭翁》經已連贏9期，上次推介熱熱哋嘅捷克得手，今次玩「讓球」，撐我嘅揀史特加，唔信會輸畀史浩克。
畢傑
近5場往績：WWWWW
讓球：史特加（平）
心得：史浩克作客唔識贏