偌大股海各類分析百花齊放，稍前和某些股友閒聊，收到風坊間有一派分析指出，港股踏入農曆9月後，有可能出現較深之大調整。唔知各位股友有冇聽過，不過星俠當時聽到呢度，已經唔想再聽落去。
雖然有一派分析會以中國農曆節氣來測市，但究竟係憑乜理據去判定踏入農曆九月個市即大散？傳言來源並無詳細交代，所以傳言信唔信，散戶自行判斷，不過，無謂搵我來搞嘞。
大市高位整固，但一樣有唔少股份升勢唔停，好似近期連窩輪發行商都大力推埋一份之比亞迪（1211），受惠加入新華富時中國25指數，炒上79.55元創新高。呢一浸純炒入指數似乎虛火過度，下周股價調整機會好大，散戶要執生。
燃氣股板塊近期強勢畢露，好似中國燃氣（384）受惠與中石油（857）訂立戰略合作拓展燃氣業務，股價復牌即大幅抽升，收報3.24元，上升近11%。
另一隻走勢較落後的港華燃氣（1083），本周中急升一棍，其後在2.8元水平橫行兩三日，昨日股價見異動，上升2.5%收2.9元，成交量略增至234萬股，似儲力蓄勢爆升格，料後市將伺機上破今年高位3元，可跟勢買入，短炒目標3.2元，跌穿2.7元止蝕。
方星俠