有人說MR.是新Beyond，論受歡迎程度仍有距離，但講到出身，又幾似。來自屋邨，也像很多年輕人一樣，父母離異，或者無心讀書只想夾band。
很多成功人士都說在最艱難時如何咬緊牙關捱下去，可是翻開MR.的過去，不離半工讀辛苦就唔讀，或怕輸，或怕悶，云云。
別期望太高，MR.之所以叫MR.，就是取「平凡人」之意，跟你我一樣，像一面鏡，從中看到年輕人的軟弱和堅強。
年輕人最大籌碼是青春，因為還有時間，所以生命中還有很多個「如果」，像新碟名稱《IfIam》一樣。可是總有些，是錯過了就是錯過了。
撰文：吳佩思
《如果我是陳奕迅》歌詞節錄
如果我是陳奕迅
這句話太吸引
獨站在鎂光下逃離樹蔭
還是我不去面對黑暗
白日夢破醒了滿腔餘音
MJ
如果可以同阿媽住
問MJ用幾多時間畫眉，答案是10秒鐘一隻，他說畫下眼線，是為了令樣子看來醒神一點。「我細個好鍾意畫畫，其實我唔鍾意講嘢，我鍾意聽人講嘢多啲。我又鍾意睇書，其實係一個悶棍。」所以他說，女友卓韻芝的出現是miracle，令他變得健談。
MJ在父母離婚的陰影下長大。「10歲嗰陣全家移民去加拿大，喺嗰邊接觸搖滾樂，完全改變我嘅人生。雖然endup我讀書唔成，中學未畢業已經放棄咗，因為父母離婚。」
MJ說故事：「我跟媽咪嘅，佢返香港先，喺麻雀館做十幾個鐘供我讀書，後來佢打畀我，話阿仔你不如返香港啦。」返港之前，MJ有過垂死掙扎：「我同媽咪講，你唔使咁辛苦啦，我去做part-time賺學費啦，每日放學喺超級市場做到11點，維持咗大半年，呢個係人生低潮。後來媽咪問我，阿仔，我唔喺你身邊嗰幾年你辛唔辛苦呀？我咪講晒出嚟囉。好記得嗰次同佢喺條街度傾偈，傾完佢就返麻雀館。走嗰陣我見佢耷低頭行，嗰刻我真係好內疚，我唔應該咁樣講嘢。後來我搵第一份工，7,500蚊一個月，我就同媽咪講，你退休啦，等我同兩個哥哥養你。」
如果，MJ說，如果可以，最想跟母親一起住。「初初夾band嗰陣，band房喺海洋公園嗰邊，屋企喺屯門，夾完band返屋企都3、4點，第二日8點起身返工，支持唔到，直到我睇到隊band會有唱片公司簽嗰陣，我就搬咗出去。如果經濟能力好啲，租番間大啲嘅屋同媽咪一齊住。」
Tom
如果我有好好讀書
與o靚模Evelyn傳緋聞的Tom不是半唐番，可是中文麻麻。他生於破碎家庭，不知是否因為怕失去更多，所以Tom很怕輸。「我做每樣嘢，一係唔做，一做就會好專注，讀書嗰陣我淨係練乒乓波，喺學校打親都贏，喺出面公開比賽就打親都輸，咁就諗不如專注打鼓啦，因為玩音樂冇得比較。玩音樂咪最啱囉，家嗰啲樂壇頒獎禮，其實係香港自己定出嚟之嘛，你攞到組合金獎去到Woodstock人哋可能都唔知你MR.係邊個。音樂根本就冇得咁樣比，打波真係一分一分咁計o架嘛。」
Tom是MR.中年紀最小的一個，20出頭，大家都像疼孻仔般疼他，就當是彌補一點他失去的溫暖。「我好想好好學番中文，我好後悔細個冇學好，家填唔到詞。我13歲嗰陣阿爸阿媽離婚，經濟一路差，我跟阿爸，有個細佬。我自細好鍾意打鼓，開頭阿爸都有錢畀我學，後尾真係afford唔到，咪要自學囉。好後悔細個真係冇讀多啲書。」
Ronny
如果我有學結他
樣子鬼鬼哋的Ronny，很少發言，平時做訪問都是由Dash和Alan做發言人，是的，Ronny確是不喜歡說話，以前。「我做咗好多份工、成六七份工，一直都係做sales。我第一份工係tempclerk，喺公司執頭執尾，當時我最憎做sales，因為我唔鍾意講嘢，唔鍾意sell人，但後尾發覺sales呢個工作根本無可避免，無論你做任何嘢，其實都係sell緊嘢，你做人其實都係sell緊你自己、希望人哋接受你。做sales嘅重點係知道點樣同人溝通，有時唔需要用好多技巧，只要真少少待人已經OK。我第一份sales係喺百老匯sell相機，返咗兩日工就俾人炒咗，佢話我唔適合做sales。」之後Ronny所有工作，都是做sales。「我去咗中環一間燈飾舖度做，開始捉到技巧，仲升到去做shopmanager，而且我仲係最後入嚟嗰個，不過其實嗰間舖頭得兩個人咋，哈哈。」
「我唯一後悔就係十年前玩結他嗰陣，冇真正跟過師傅學，家會發現原來有啲壞習慣係會跟你一世。如果我當初肯花少少錢跟阿sir學，起碼你會知正確方法係點做，好好多。」
Alan
如果阿爸話我有用
訪問當天，聲線似陳奕迅的Alan生病了。聽他的聲線很沙，說：「我唔識唱歌o架，如果讀書嗰陣有聽老師講入choir，家會勁好多。夾band又嗌慣，一嗌慣嗌到喉嚨痛，日日都要唱，食飯又唔係飽，個人已經孱，呢個係最難最大壓力。」Eason現時教他唱歌運氣速成法，最基本是：唔好諗有問題先。阿Q精神嗎？少少。
Alan是樂隊主音，也是靈魂人物，交際應酬作曲填詞都是他，可是原來背後有隱憂：「我係幾張刀，冇張利。我屋企係小康之家，有錢供我去加拿大讀書，讀咗四年，大一嗰年阿爸失業，冇晒錢，我就返嚟喇。返到嚟，又要返工，又要喺港大讀經濟，又要夾band，成半年都係咁，真係頂唔順，根本返學係用嚟瞓覺嘅，結果我放棄咗，寧願返工同夾band。
「我有兩年都係家庭支柱，阿爸失業嗰陣要拎錢返屋企，好彩佢幾年前搵番份工做，我負擔冇咁大。阿媽話過我：『夾band有前途咩？』阿爸就冇出聲。我由細到大都好怕佢，佢大我30幾年，好有威嚴，好難同佢溝通，家叫做做咗啲成績，阿爸終於覺得我有用喇。」
Dash
如果我有得拍拖
相對而言，Dash似是較幸福的一個，家境比上不足比下有餘。完成大學課程，這是家人對他的唯一要求，雖然他根本不愛讀書。「畢業之後我喺物流公司做嘢，後嚟去咗唱片公司做part-time，做咗幾年，對唱片公司運作都有多啲了解。」時間用在那裏是看得見的，Dash是典型工作狂，開工時不眠不休，可以置生死於度外，包括女朋友。
「我真係好想拍拖，我已經有成兩三年冇拖拍，之前我太投入工作，唔識分配時間，搞到分手。家反而學識分配時間，所以我好希望再有拖拍，希望兩樣都兼顧。」Dash有個孖生細佬叫阿榮，阿榮的未婚妻，就是商台DJ朱薰。「多謝細佬幫到我好多，負擔屋企嘅正常開支。家我有錢都會拎返去，死爛都攞到幾千蚊返去，唔係多，至少令老人家可以安心啲。」Dash寫過首歌《背影》，背後來自一個故事。「我好細個公公婆婆同爺爺嫲嫲已經唔喺度，我公公婆婆仲係俾個癲佬斬死，就算我再有乜嘢成就都唔可以再同佢哋分享，同埋覺得長輩好容易離開我哋，令我更加識得珍惜同家人相處嘅時間。」
